რესპუბლიკური პარტიის ერთ-ერთი ლიდერი, საპარლამენტო სიის მეოთხე ნომერი და ზესტაფონის მაჟორიტარი დეპუტატობის კანდიდატი თინა ხიდაშელი რუსთავი 2-ზე რეგიონალურ დებატებში წარსდგა და დაპირებებსა და რესპუბლიკელების მიღწევაზე მისთვის განსაზღვრულ 1 წუთში ისაუბრა.

თავდაცვის ყოფილი მინისტრის თქმით, 2016 წლის საპარლამენტო არჩევნები 2012 წელს ხელისუფლებაში მოსული პირების მთავარი მონაპოვარია და მისი თქმით, სამწუხაროა, რომ "იმ ადამიანებიდან" დღეს ცოტაა დარჩენილი მთავრობაში:

"ჩვენ ნამდვილად ისტორიული არჩევნების წინაშე ვდგავართ, დღეს პირველად გახდა შესაძლებელი, რომ ჩვენ აღარ გვქონდეს ომი, ჩვენ გვაქვს არჩევნები. ეს 2012 წლის მთავარი მონაპოვარია და ეს ჩვენ ყველამ ერთად მოვიპოვეთ, სამწუხაროდ იმ ადამიანებიდან დღეს ძალიან ცოტა ადამიანია დარჩენილი დღეს მმართველ გუნდში".

ხიდაშელი ზესტაფონის ამომრჩეველს სიღარიბის დაძლევას შეჰპირდა:

"თუ თქვენთვის ღირებულია ერთგულება, თუ თქვენთვის ღირებულია პროფესიონალიზმი, კვალიფიკაცია და სახელმწიფო, რომლის ცენტრიც არის ადამიანი, მისი ინტერესები, თუ ფიქრობთ რომ სახელმწიფო ორიენტირებული უნდა იყოს უმუშევრობის, სიღარიბისა და ძვირი წამლების პრობლემის დაძლევაზე, თქვენ ხმა უნდა მისცეთ რესპუბლიკელებს".

"უსუფაშვილი - რესპუბლიკელები" - ამ სახელწოდებით პარტიამ 12 ივლისიდან საარჩევნო კამპანია დაიწყო. არჩევნებში მონაწილეობის გამო მინისტრის პოსტები დატოვეს თინა ხიდაშელმა და პაატა ზაქარეიშვილმა.