YouTube-მა განაცხადა, რომ ბავშვების ვიდეოებზე კომენტარების დატოვების ფუნქციას გათიშავს, მას შემდეგ, რაც პლატფორმა პედოფილებისთვის ბავშვების ვიდეოების პოვნის ხელშეწყობაში დაადანაშაულეს.

კომპანიის განცხადებით, ბავშვების მონაწილეობით ათობით მილიონ ვიდეოზე კომენტარების დატოვება უკვე მიუწვდომელია, თუმცა ვიდეოების ძიებისა და მათზე ფუნქციის გათიშვის პროცესი კიდევ რამდენიმე თვის განმავლობაში გაგრძელდება.

"გვესმის, რომ იუთუბზე კომენტარების დატოვება ერთ-ერთი მნიშვნელოვანი გამოცდილებაა, რაც ადამიანებს ერთმანეთთან დაკავშირებასა და მაყურებლების მოზიდვაში ეხმარება. ამავდროულად, ნაბიჯები, რომლებსაც დღეს ვდგამთ, კრიტიკულად მნიშვნელოვანია ბავშვების უსაფრთხოებისთვის", - წერია YouTube-ის ბლოგპოსტში.

გასულ კვირას, ვიდეოების შემქმნელმა მეთ უოტსონმა განაცხადა, რომ იუთუბის ალგორითმი პედოფილებს ეხმარებოდა ბავშვების ისეთი ვიდეოების პოვნაში, რომლებშიც ისინი ტანვარჯიშით ან იოგით იყვნენ დაკავებულნი. ამაში მათ საიტის მიერ რეკომენდირებული ვიდეოების სიაც ეხმარებოდა. მომხმარებლების ნაწილი ბავშვების ვიდეოებზე აკომენტარებდა კონკრეტულ დროს, რომლებშიც ისინი მათ მდგომარეობას "სექსუალურ პოზებად" აფასებდნენ.

ბრალდებების შემდეგ, იუთუბიდან რეკლამები აიღეს ისეთმა ცნობილმა კომპანიებმა, როგორიცაა ნესტლე, AT&T, Epic Games და ა.შ.

იუთუბის განცხადებით, კომენტარების დატოვების ფუნქცია შეიზღუდება როგორც 13 წლამდე ბავშვების ვიდეოებზე, ასევე იმ ვიდეოებზეც, რომლებშიც 18 წლამდე ასაკის მოზარდები მონაწილეობენ.

ვიდეოების შემქმნელთა მცირე ნაწილს კომენტარების დატოვების ფუნქცია არ შეეზღუდება, თუ ისინი აქტიურად გააკონტროლებენ გამოხმაურებებს და დაამტკიცებენ, რომ მათი კონტენტი რისკის შემცველი არაა. იუთუბის წარმომადგენლები არ აკონკრეტებენ, რა სპეციფიკის არხები აირიდებენ შეზღუდვას.

ვიდეოებს, რომლებშიც ბავშვები მონაწილეობენ, ხელოვნური ინტელექტის საშუალებით ალგორითმი პოულობს. იუთუბის არჩეული მეთოდი სრულყოფილი შესაძლოა არ იყოს, რადგან კომპიუტერს გაუჭირდეს კონკრეტული ადამიანის ასაკის ამოცნობა. საქმეს ართულებს ვიდეოში არსებული განათება და მათში მონაწილეთა მდგომარეობა.

სოციალური მედია ცოტა ხნის წინ მშობლებმაც გააკრიტიკეს ბავშვების განყოფილებაში არსებული სახიფათო ვიდეოების გამო. იუთუბი აპირებს, რომ მსგავსი ვიდეოების წასაშლელად 10 ათასამდე ადამიანი დაიქირავოს.