"ბატონო მინისტრო, გვინდა ყურადღება გაგამახვილებინოთ იმ ფაქტზე, რომ შრომა, რომელსაც დიასახლისები ეწევიან და რომელზეც მთელი ქვეყნის მოსახლეობა დგას, საშინაო შრომა ჰქვია", — ამ სიტყვებით მიმართა სოლიდარობის ქსელმა საქართველოს ეკონომიკის მინისტრს, გიორგი ქობულიამ, რომელმაც პარლამენტში განაცხადა, რომ "დიასახლისებს მუშაობა არ სურთ".

სოლიდარობის ქსელი გავრცელებულ განცხადებაში წერს, რომ დღეს საქართველოში სამსახურის ქონას, არსებული მიზერული ხელფასების პირობებში, შემოსავალზე მეტად ხარჯი მოაქვს.

"გზის ფული და საკვები დამატებითი ხარჯია, რომელიც ხშირად სახელფასო შემოსავალს აჭარბებს, რის გამოც ჩვენს ქვეყანაში არსებობს უამრავი დასაქმებული ღარიბი. 300 - 400 ლარიან ხელფასზე გაწერილმა თვიურმა ბიუჯეტმა მოსახლეობის უდიდესი ნაწილი ვალებში ჩააგდო — ჩვენი ქვეყანა მსოფლიოში მოწინავე პოზიციას იკავებს დავალიანების კუთხით", — ვკითხულობთ განცხადებაში.

ორგანიზაციის პოზიციით, საჯაროდ, ყოველდღიურ საუბრებში, თუ სტატისტიკურ მონაცემებში, ყველასთვის შესამჩნევია ქალთა ეკონომიკური გააქტიურება, რადგან ოჯახს უკვე ერთი ადამიანის შემოსავალი აღარ ყოფნის და ინდუსტრიასთან ერთად, 90-იანი წლების შემდგომ, გაქრა კაცების დასაქმების ტრადიციული ადგილებიც.

"არ უნდა დაგვავიწყდეს, რომ ძალიან ხშირად, ქალები მუშაობენ მომსახურების სფეროში, რომელიც ყველაზე დაურეგულირებელი სფეროა. მათ უწევთ კვირაში 50-70 საათი მუშაობა, ყოველგვარი ზეგანაკვეთური სამუშაოს ანაზღაურების გარეშე. ჩვენ კიდევ ერთხელ, ვითხოვთ, 40 საათიანი სამუშაო კვირისა და ზეგანაკვეთური შრომის ანაზღაურების პრაქტიკაში დაწესებას", — აცხადებენ ორგანიზაციაში.

განცხადებაში ასევე ნათქვამია, რომ ორმაგი ცვლა, იგივე ორმაგი შრომა არ არის ახალი საკითხი ქალებისთვის, თუმცა ახალი და საგანგაშოა ეკონომიკის მინისტრის დამოკიდებულება: "დიასახლისები აცხადებენ, რომ მუშაობა არ სურთ".

"არ არსებობს უმუშევარი ქალი ! უცნაურია, თუ რის საფუძველზე აკეთებთ მსგავს დასკვნებს. შეგახსენებთ, რომ ყველაზე მზარდი ეკონომიკური სექტორი - მომსახურების სფერო - სწორედაც რომ არსებული დიასახლისებისგან შედგება, რომლებიც მუდმივ რეჟიმში ასრულებენ საშინაო შრომას", — აცხადებენ ორგანიზაციაში.

ეკონომიკის მინისტრმა, გიორგი ქობულიამ საქართველოს პარლამენტში სამინისტროს ანგარიშის წარდგენისას განაცხადა, რომ სტატისტიკით, ძალიან ბევრი ადამიანი სამუშაო ძალის გარეთაა, მაგრამ ასევე არიან ადამიანები, რომლებიც საერთოდ მუშაობა არ სურთ. ამ ადამიანების რიგში ეკონომიკის მინისტრი დიასახლისებსაც მოიხსენიებს.