ხორვატიის ეროვნული ნაკრებისა და რეალის ნახევარმცველი ლუკა მოდრიჩი ოქროს ბურთის მფლობელი გახდა. ოქროს ბურთს არაოფიციალურად წლის საუკეთესო ფეხბურთელის ჯილდოსაც უწოდებენ.

ეს პირველი შემთხვევაა ბოლო ათი წლის განმავლობაში, როდესაც ოქროს ბურთი კრიშტიანუ რონალდუსა და ლიონელ მესის გარდა სხვა ფეხბურთელმა მიიღო. მათ ჯილდო ხუთ-ხუთჯერ გადაეცათ.

ჯილდოს მიღების დროს მოდრიჩმა მადლობა გადაუხადა კლუბის მოთამაშეებს, თანამშრომლებსა და მწვრთნელს. მოდრიჩი გახდა პირველი ფეხბურთელი ხორვატიიდან, რომელმაც ჯილდო მიიღო.

33 წლის ნახევარმცველი მიმდინარე წელს დაეხმარა რეალს, რომ ჩემპიონთა ლიგა მოეგო და რუსეთში მსოფლიო თასზე ხორვატიის ნაკრების წარმატებაში დიდი წვლილი შეიტანა. 2018 წლის მსოფლიო ჩემპიონატზე ხორვატიამ თავის ისტორიაში პირველად ითამაშა ფინალში.