საქართველოს ეროვნულმა საფეხბურთო ნაკრებმა UEFA-ს ერთა ლიგის მესამე ტურის მატჩზე ანდორას ნაკრები ანგარიშით 3-0 დაამარცხა.

მატჩის 33-ე წუთზე საქართველოს ნაკრების სასარგებლოდ ანგარიში შემტევმა ნახევარმცველმა, ვაკო ყაზაიშვილმა გახსნა. 84-ე წუთზე ყაზაიშვილმა კიდევ ერთი გოლი გაიტანა და დუბლი შეასროლა. მესამე გოლი კი თამაშის დასასრულს, 94-ე წუთზე ნაკრების კაპიტანმა, ჯაბა კანკავამ გაიტანა.

ერთა ლიგის ჩემპიონატზე საქართველოს ნაკრებმა ზედიზედ მესამე მატჩი მოიგო და 9 ქულა დააგროვა. საქართველოს ნაკრები ჯგუფში პირველია.

მატჩი დინამო არენაზე დღეს, 13 ოქტომბერს გაიმართა. მატჩის პირდაპირ ტრანსლაციას საზოგადოებრივი მაუწყებლის პირველი არხი წარმოადგენდა. მომდევნო შეხვედრას ნაკრები ლატვიაში 16 ოქტომბერს გამართავს.