Sport-express-ის ინფორმაციით, რუსთავის ნახევარმცველის, ხვიჩა კვარაცხელიას შეძენაში, მოსკოვის ლოკომოტივს, შესაძლოა, ბაიერნი შეეცილოს.

აღსანიშნავია, რომ ინფორმაცია იმის შესახებ, რომ ბაიერნი კვარაცხელიათი იყო დაინტერესებული, ჯერ კიდევ აპრილში გავრცელდა. მეტიც, ზოგიერთი წყაროს ცნობით, მას პირადი შეთანხმებაც ჰქონდა მიღწეული მიუნხენელებთან.

კვარაცხელის გვარი კი გუშინ მოსკოვის ლოკომოტივის სატრანსფერო კომიტეტის სხდომაზეც გაისმა. მისი დამატების სურვილი თავად მთავარმა მწვრთნელმა იური სიომინმა გამოთქვა.

ხვიჩა კვარაცხელია თბილისის "დინამოს" აღზრდილია. 2018 წლის მარტში იგი რუსთავში გადავიდა. მას შეუძლია გარემარბის, თავდამსხმელის, მეორე ფორვარდისა და შემტევი ნახევარმცველის პოზიციაზე თამაში. იგი საქართველოს ახალგაზრდული ნაკრების წევრია. გასულ ზაფხულს კი მან რუსეთის ნაკრებს ულამაზესი გოლიც გაუტანა.