საფრანგეთში პოლიტიკოსებმა საჯარო ადგილებში სექსუალური შევიწროების წინააღმდეგ კანონი მიიღეს, რომელიც მინიმალურ ჯარიმად 750 ევროს ითვალისწინებს.

ახალი კანონის მიხედვით, დანაშაულად ითვლება სექსუალური სახის თავდასხმა ქუჩაში და სხვა საჯარო ადგილებში. ასევე ბილწი შინაარსის მიძახებები და დამამცირებელი კომენტარები.

კანონპროექტი საფრანგეთის საკანონმდებლო ორგანოში თვეების განმავლობაში განიხილებოდა, თუმცა ის ქუჩაში თავდასხმის კადრების გავრცელებიდან რამდენიმე დღეში, ორი მოსმენით მიიღეს.

ვიდეო ფეისბუქზე 2 კვირის წინ გავრცელდა და მას რამდენიმე მილიონი ნახვა აქვს. კადრებში ჩანს, რომ პარიზში კაცი ქალს საჯაროდ ესხმის თავს.

მარია ლაგუერი სახლში მიდიოდა, როდესაც, მისი სიტყვებით, კაცმა მას სექსუალური შინაარსის, შეურაცხმყოფელი სიტყვები მიაძახა და დაუსტვინა.

მარიას თქმით, მან უცნობს უთხრა, რომ მოეკეტა, რის შემდეგაც, ის მას გამოეკიდა და ჯერ საფერფლე ესროლა, შემდეგ კი, ფიზიკურად დაესხა თავს.

თავდასხმის მომენტი კაფის გარეთ მოხდა, შენობაზე არსებულმა კამერამ კი ინციდენტი სრულად ჩაიწერა. მოგვიანებით მარია ადგილზე დაბრუნდა და ჩანაწერი მოითხოვა.

"ეს მიუღებელი ქცევაა და მსგავსი ყოველდღიურად ხდება. არ ვიცნობ ქალს, რომელსაც სექსუალური შევიწროების გამოცდილება არ აქვს. ქუჩაში სიარულის დროს თავს საფრთხეში არ უნდა ვგრძნობდე, ბევრი რამაა შესაცვლელი, რაც სასწრაფოდ უნდა მოხდეს", - დაწერა მან ფეისბუქზე კანონის მიღებამდე.

საქმეზე გამოძიება დაწყებულია, თუმცა თავდამსხმელი ჯერჯერობით იდენტიფიცირებული არაა.

"ქუჩაში თავდასხმა და შეურაცხყოფა აქამდე დაუსჯელი რჩებოდა. ამიერიდან, ეს ასე აღარ იქნება", - განაცხადა გენდერული თანასწორობის საკითხების მინისტრმა მარლენ შიაპამ.

იგივე კანონპროექტის მიხედვით, დასჯადი ხდება ადამიანებისთვის თანხმობის გარეშე კაბის ქვეშ და ტანსაცმლის შიგნით სურათების გადაღება, რის შემთხვევაში ჯარიმის ოდენობა იზრდება და პატიმრობაც განიხილება. კანონი 15 წლამდე არასრულწლოვნებს საშუალებას მისცემს დაამტკიცონ, თუკი სექსუალური კონტაქტი ზრდასრულებმა მათთან თანხმობისა და საკმარისად ინფორმირებულობის გარეშე დაამყარეს.