ჯულია რობერტსის კარიერა რომ 2001 წლის შემდეგ, ერინ ბროკოვიჩში შესრულებული მთავარი როლის და მიღებული ოსკარის შემდეგ, უკან-უკან წავიდა, ყველა დიდი ხანია თანხმდება.

მსახიობი წლების განმავლობაში მხოლოდ ერთფეროვან როლებს თანხმდებოდა და ისიც მხოლოდ იმ შემთხვევაში თუ ჰონორარი 15 მილიონ დოლარს აჭარბებდა. მიუხედავად იმისა, რომ რობერტსი წლების განმავლობაში ყოველთვის ექცეოდა ჰოლივუდის ყველაზე გავლენიანი და მაღალანაზღაურებადი მსახიობების სიაში, შეიძლება ითქვას, რომ მისი როლები არასდროს აძლევდნენ საშუალებას ნიჭი ბოლომდე გამოემჟღავნებინა.

2013 წელს კი მსახიობს, როგორც ამბობენ, მეორე სუნთქვა გაეხსნა და როლების შერჩევა დიდი სიფრთხილით დაიწყო. მისი მონაწილეობით გამოსული ფილმი აგვისტო: ოსეიჯის საგრაფო, სადაც პარტნიორობას მერილ სტრიპს უწევს, წლის ერთ-ერთ მთავარ კინო მოვლენად იქცა, ჯულია რობერტსმა კი როლისთვის ოსკარის ნომინაცია და კრიტიკოსებისგან ალბათ ყველაზე დიდი შეფასება მიიღო - “რობერტსმა თვით მერილ სტრიპი დაჩრდილა”, წერდნენ გამოცემები.

არანაკლებ წარმატებული აღმოჩნდა მისი მომდევნო როლები:

  • HBO-ს სატელევიზიო ფილმში ნორმალური გული, სადაც მან ეტლით მოსარგებლე ექიმის ემა ბრუკნერის როლი შეასრულა.
  • საიდუმლო მათ თვალებში, რომელშიც სრულიად განსხვავებული ჯულია რობერტსს ნახავთ
  • და ჯოდი ფოსტერის რეჟისორობით შექმნილი ფინანსური მონსტრი, რომელიც ჯულიასთვის კრიტიკოსების აზრით შესაძლოა ოსკარის მომტანიც კი აღმოჩნდეს.

წლევანდელ კანის ფესტივალზე კი მსახიობმა ყველა და ყველაფერი გადაფარა, როგორც საერთაშორისო, ისე თავად ადგილობრივი მედია იუწყებოდა, რომ პირველად მოხდა, როდესაც ერთი მსახიობის წითელ ხალიჩაზე გამოჩენამ მთელი ფესტივალი დაჩრდილა.

2017 წელი, სავარაუდოდ, ასევე წარმატებული და მნიშვნელოვანი იქნება 48 წლის მსახიობისთვის. ჯულია ერთ-ერთ მთავარ როლს რ. ჯ. პალაციოს წიგნის “საოცრების” ეკრანიზაციაში შეასრულებს. ნაწარმოები დეფორმირებული სახით დაბადებული ავგუსტ პულმანის ისტორიაზეა.

რობერტსის გარდა ფილმში “ოთახის” ვარსკვლავი ჯეიკობ თრამბლი (ავგუსტ პულმანი) და ოუენ უილსონი (ნეტ პუმლანი) შეასრულებენ.

სულ ცოტა ხნის წინ, გადასაღები მოედნიდან ჯულია რობერტსისა და ოუენ უილსონის რამდენიმე კადრიც გავრცელდა, რომელმაც უკვე აალაპარაკა კინომანები. ძირითადი განხილვის თემა კი “ლამაზმანის” ვარსკვლავის ახალი იმიჯი გახდა.

ფოტო: FameFlyNet

ფილმის პრემიერა 2017 წლის 7 აპრილს არის დაგეგმილი. ხოლო მის გამოსვლამდე აუცილებლად წაიკითხეთ წიგნი, რომლის ქართული თარგმანიც ბაკურ სულაკაურის გამომცემლობამ გამოსცა.