უმრავლესობის ლიდერის, ეკა ბესელიას განცხადებით, სამთავრობო ცვლილებებსა და სამინისტროების გაერთიანებაზე კონსულტაციები გრძელდება და ისევ უცნობია ახალი მინისტრთა კაბინეტის შემადგენლობა.

ბესელიას თქმით, უმრავლესობა განიხილავს რამდენად მნიშვნელოვანია ორგანულად თავსებადი უწყებების გაერთიანება და რა შედეგებს გამოიწვევს ეს გაერთიანება. მისივე თქმით, ბახტაძის ინიციატივა 14-დან 11 სამინისტროს დატოვებაზე უმრავლესობისთვის მისაღებია, თუმცა გრძელდება განხილვა.

ბესელიას თქმით, საბოლოო გადაწყვეტილებას პრემიერ-მინისტრი, მამუკა ბახტაძე უახლოეს დღეებში გააჟღერებს.

პრემიერ-მინისტრობის კანდიდატად წარდგენის შემდეგ, მამუკა ბახტაძემ განაცხადა, რომ პრიორიტეტი მცირე ზომის, მაგრამ ოპერატიული და მოქნილი მთავრობა იქნება.

19 ივნისს კომიტეტების გაერთიანებულ სხდომებზე მინისტრობისა და პრემიერ-მინისტრობის კანდიდატებს უსმენდნენ. 20 ივნისს კი კენჭისყრაზე პარლამენტმა მთავრობას დაუჭირა მხარი. ბახტაძემ განაცხადა, ამჟამინდელი მთავრობა ძველი შემადგენლობით არის დროებითი.