სომხეთის პრემიერ-მინისტრი, ნიკოლ პაშინიანი 30-31 მაისს საქართველოს ოფიციალური ვიზიტით ეწვევა. ინფორმაციას ეხო კავკაზა ავრცელებს.

გარდა ამისა, დამოუკიდებლობის 100 წლისთავთან დაკავშირებით 25-26 მაისს საქართველოში სომხეთის პრეზიდენტი არმენ სარქისიანი ჩამოვა.

რამდენიმე დღის წინ, სომხეთის ახალარჩეულმა პრემიერმა, ნიკოლ პაშინიანმა განაცხადა, რომ საქართველოსა და სომხეთს შორის ურთიერთობები გეოპოლიტიკურ გავლენებს არ უნდა ეფუძნებოდეს და კიდევ უფრო უნდა გაღრმავდეს.

"საქართველო მეგობარი სახელმწიფოა. საქართველოსა და სომხეთის ძმური ურთიერთობები უნდა განვითარდეს, რადგან ჩვენ ვართ მოძმე ქვეყნები და ახლო პარტნიორები. ჩვენი პარტიის პროგრამაში საქართველოს გადამწყვეტი მნიშვნელობა აქვს სომხეთისთვის.

ვფიქრობ, ჩვენი ურთიერთობები გეოპოლიტიკურ გავლენებს არ უნდა ეფუძნებოდეს. ზოგჯერ ჩვენ ურთიერთობებზე გავლენას ახდენს გეოპოლიტიკური ფაქტორები და სამწუხაროდ, ამ ფაქტორების გავლენა ყოველთვის პოზიტიური არ არის. ზოგჯერ გვაქვს ნეგატივი", – განაცხადა ნიკოლ პაშინიანმა.

ყოფილი პრემიერ-მინისტრი სერჟ სარგსიანი თანამდებობიდან 23 აპრილს, 11-დღიანი საპროტესტო აქციების შემდეგ გადადგა. აქციების ორგანიზატორი და ოპოზიციის ლიდერი, ნიკოლ პაშინიანი პრემიერ-მინისტრად 8 მაისს აირჩიეს.