თეთრი ხმაურის მოძრაობის განცხადებით, შინაგან საქმეთა სამინისტრომ კლუბებში სპეცრაზმის შესვლა დაცვის მხრიდან შესაძლო წინააღმდეგობის თავიდან აცილებით გაამართლა.

გუშინ, 15 მაისს, შინაგან საქმეთა მინისტრს თეთრი ხმაურის მოძრაობის, არასამთავრობო სექტორისა და კლუბების წარმომადგენლები შეხვდნენ. შეხვედრის ძირითადი საკითხი შეეხებოდა კლუბებში განხორციელებული ოპერაციის საფუძვლებს, 12 მაისის ღამის დაკავებებს, პოლიციის მხრიდან ძალის გადამეტების ფაქტებსა და შეკრებისა და მანიფესტაციის უფლების ხელყოფას.

ორგანიზაციის განმარტებით, შსს ოპერაციის ორ მიზეზს ასახელებს:

  • 12 მაისის ღამეს კლუბებსა და მიმდებარე ტერიტორიაზე შესაძლო რეალიზების ფაქტები;
  • უცნობი სუბსტანციის გამოჩენის ფონზე საზოგადოებრივ უსაფრთხოებასა და ჯანმრთელობაზე ზრუნვა.

თეთრი ხმაურის მოძრაობის განმარტებით, შსს-მ იცის, რომ კლუბ ბასიანის ადმინისტრაცია გარეული არაა რეალიზაციის საქმეში, მაგრამ ეს გარემოება ღონისძიებას ვერ შეაკავებდა.

"რაც შეეხება კლუბ გალერის, მათი თქმით, კლუბის ერთ-ერთი თანამშრომლის პასუხისმგებლობა იკვეთებოდა, რომელიც დაკავებულია კლუბის მიმდებარე ტერიტორიაზე და არა შიგნით. ვერ მივიღეთ დამაჯერებელი პასუხი თუ რატომ ბასიანი, გალერი, და ბლოუ-ბარი, როცა სასამართლოს განჩინება ჩხრეკაზე გაცემული იყო სხვა კლუბებზეც", - ნათქვამია განცხადებაში.

მათივე თქმით, სამინისტრო არ მიიჩნევს, რომ შეკრების და მანიფესტაციის უფლება დაირღვა.

"შსს უკანონო დაკავებებსა და ადამიანთა უფლებების უხეშ დარღვევებზე ამბობს, რომ მათთან განცხადებები არ შესულა, თუმცა გადაცდომების არსებობას არ გამორიცხავს. ადმინისტრაციულად დაკავებულთა მიმართ კი სასამართლო დავები ამ დრომდე არ დაწყებულა. ჩვენ დავაყენეთ მოთხოვნა უკლებლივ ყველა დაკავებული პირის მიმართ ადმინისტრაციული წარმოების შეწყვეტაზე, რაზეც მინისტრის მოადგილემ განაცხადა, რომ ამაზე მსჯელობა მიმდინარეობს", - ნათქვამია განცხადებაში.

გაიგეთ მეტი: