104 წლის ავსტრალიელმა მეცნიერმა დევიდ გუდოლმა დღეს ევთანაზიის დახმარებით სიცოცხლე დაასრულა.

დევიდი უკვე 20 წელია, რაც ევთანაზიის მომხრე ჯგუფის Exit International-ის წევრია. მან შემოწირულობებით $20 000-ზე მეტი შეაგროვა და ამ თანხით დააფინანსა საკუთარი მგზავრობა შვეიცარიის ქალაქ ბაზელში, სადაც ევთანაზია დაშვებულია. დღეს მან კლინიკაში ბეთჰოვენის ფონზე ევთანაზიით დაასრულა სიცოცხლე.

ევთანაზია სამედიცინო პროცედურაა, რომელიც მსურველს ექიმების დახმარებით საკუთარი სიცოცხლის დასრულებაში ეხმარება. რიგ ქვეყნებში, მაგალითად, იაპონიაში, ბელგიასა და შვეიცარიაში ევთანაზია ლეგალურია, ხოლო ქვეყანათა უმეტესობაში მსგავსი პრაქტიკა მიუღებელია და ტაბუდ არის შერაცხული. ჯერჯერობით ავსტრალიაც მსგავს ქვეყანათა რიცხვს მიეკუთვნება. ვიქტორიის შტატი 2019 წლიდან მსგავსი პრაქტიკის დაშვებას გეგმავს. დევიდ გუდოლის მშობლიური დასავლეთ ავსტრალიის შტატი კი ამჟამად მსჯელობს იმაზე, დაუშვას თუ არა თავის ტერიტორიაზე მსგავსი პრაქტიკა.

გარდაცვალებამდე 2 დღით ადრე ჩაწერილ ინტერვიუში დევიდმა აღნიშნა, რომ მისი ცხოვრება ბოლო 5-10 წლის განმავლობაში სრულიად უსიამოვნო იყო. მას მხედველობა ძალიან დაუქვეითდა და დამოუკიდებლად გადაადგილებაც კი აღარ შეეძლო. ფიზიკური შესაძლებლობების დაქვეითების მიუხედავად, ავსტრალიელ პროფესორს იუმორის გრძნობა არ დაუკარგავს. მას სიცოცხლის წრის კლინიკაში ინტერვიუს აღებისას ეცვა ჯემპრი წარწერით "სამარცხვინო დაბერება" (Ageing Disgracefully).

დევიდ გუდოლი სამშაბათს, ინტერვიუს აღებისას

ფოტო: CNN

მეცნიერი იმედოვნებდა, რომ მისი გადაწყვეტილება ხელს შეუწყობს ევთანაზიის ლეგალიზაციას სხვა ქვეყნებში.

"სიკვდილი შესაძლოა ძალიან უსიამოვნო გამოცდილება იყოს, თუმცა აუცილებელი სულაც არაა, რომ ამ ქვეყნიდან ტკივილით წავიდეთ და იმედი მაქვს, არც ჩემთვის იქნება ასე", - განაცხადა დევიდმა. გუდოლმა აღნიშნა, რომ სიკვდილის არ ეშინია და რომ მას სიხარულით ეგებება. სიცოცხლის ბოლო წამებში მეცნიერი ბეთჰოვენის "სიამოვნების ოდას" უსმენდა.