წვრილმანი ხულიგნობისა და პოლიციისადმი დაუმორჩილებლობის საქმეზე დაკავებულ გირჩის წევრებს, იაგო ხვიჩიას და ვახტანგ მეგრელიშვილს თბილისის საქალაქო სასამრთლომ 10 დღიანი პატიმრობა შეუფარდა. ამავე საქმეზე დაკავებულ ზურაბ ჯაფარიძეს კი - 2 000 ლარიანი ჯარიმა. ინფორმაციას გირჩი ავრცელებს:

გირჩის წევრები გუშინ, 2 მაისს, მას შემდეგ დააკავეს, რაც ქუჩაში მოქალაქის დაკავება გააპროტესტეს და სამოქალაქო ფორმაში ჩაცმულ პოლიციელებს წინააღმდეგობა გაუწიეს. გირჩის წევრების თქმით, პოლიცია მოქალაქეს უხეშად ეპყრობოდა. პოლიციამ ბრალდებული განყოფილებაში გადაიყვანა, სადაც გირჩის წევრებმა აქცია გამართეს მისი გათავისუფლების მოთხოვნით.

აქციის მსვლელობისას, პოლიციის განყოფილებიდან გამოსულმა პირებმა, ახსნა-განმარტების გარეშე, განყოფილებაში შეიყვანეს გირჩის წევრი, ნიკა ობოლაძე, რომელსაც ხელში ქოთანში დარგული მცენარე, სავარაუდოდ, მარიხუანა ეჭირა. შინაგან საქმეთა სამინისტროს განცხადებით, ნიკა ობოლაძე მარიხუანას კულტივირების საქმეზე მოწმის სტატუსით დაკითხეს. გირჩის წევრებს მიაჩნდა, რომ ობოლაძე დააკავეს და მის გათავისუფლებას მოითხოვდნენ.

მოგვიანებით ობოლაძემ პოლიციის შენობა დატოვა, იაგო ხვიჩია, ვახტანგ მეგრელიშვილი და ზურაბ ჯაფარიძე კი დაკითხვაზე შეიყვანეს. გირჩის ინფორმაციით, პოლიციის შენობიდან იაგო ხვიჩია და ვახტანგ მეგრელიშვილი ბორკილებდადებული გამოიყვანეს. ადმინისტრაციული საქმის წარმოება დაიწყო ზურა ჯაფარიძის წინააღმდეგაც.