ლეგენდარულ ჰოლანდიელ ფეხბურთელ იოჰან კრუიფს დღეს 71 წელი შეუსრულდებოდა. ტოტალური ფეხბურთის ერთ-ერთი მთავარი შემოქმედი (აიაქსის მთავარ მწვრთნელ რინუს მიხელსთან ერთად) 1947 წლის 25 აპრილს დაიბადა.

იოჰანმა მსოფლიო ჩემპიონის ტიტულის გარდა, თითქმის ყველა გუნდური და ინდივიდუალური ჯილდო მიიღო.

ბევრი დავობს იმის შესახებ, თუ ვინ იყო, ან არის ყველა დროის საუკეთესო ფეხბურთელი და ამაზე პასუხის გაცემა ცალსახად რთულია, თუმცა, ერთი რამ, ალბათ ნაკლებ ეჭვს აჩენს. ფეხბურთზე ყველაზე დიდი გავლენის მქონე ორი ადამიანი რომ დავასახელოთ, ერთი იოჰან კრუიფი უნდა იყოს.

წარმოგიდგენთ "მფრინავი ჰოლანდიელის" ზედმეტსახელის მქონე იოჰან კრუიფის ხუთ საინტერესო ფრაზას:

  • როცა მოედანზე ფეხბურთს თამაშობ, სტატისტიკურად, ბურთთან საშუალოდ სამი წუთით გიწევს ურთიერთობა.. ასე რომ, ყველაზე მნიშვნელოვანი ისაა, თუ, რას აკეთებ იმ 87 წუთის განმავლობაში, რომელშიც უბურთოდ ხარ. სწორედ ეს განსაზღვრავს იმას, კარგი ფეხბურთელი ხარ თუ არა.
  • რელიგიური არ ვარ. ესპანეთში მოედანზე შესვლამდე პირჯვარს 22-ვე ფეხბურთელი იწერს. ეს რომ მართლა მუშაობდეს, ყველა მატჩი ფრედ დასრულდებოდა.
  • მიყვარს ტექნიკური ფეხბურთელები, რომლებიც, უპირველეს ყოვლისა, გუნდზე ფიქრობენ. არაერთხელ აღმინიშნავს, რომ ხავიმ და ინიესტამ დაანგრიეს წარმოდგენა იმის შესახებ, რომ მათ პოზიციაზე მხოლოდ ძლიერ ფეხბურთელებს შეუძლიათ თამაში.
  • გამარჯვება მნიშვნელოვანია, თუმცა ვერაფერი შეედრება იმას, რომ გაგაჩნდეს საკუთარი სტილი, ხალხი შენგან სწავლობდეს და შენით აღფრთოვანებული იყოს. ეს ყველაზე დიდი საჩუქარია.
  • ითამაშო ფეხბურთი, ძალიან მარტივია, მაგრამ ითამაშო მარტივი ფეხბურთი, ეს ყველაზე რთული რამეა.