ერთგული ფანების პროტესტის და მანიფესტის წყალობით კლასტერის ისტორია ეთერში ბრუნდება. 8 ივნისს ნეტფლიქსზე Sense8-ის ფინალური, ორსაათიანი სერია გავა.

"ერთად დასასრულამდე", - ეს ახალი სერიის სლოგანია. ფინალურ სერიაში კლასტერი ერთად დაუპირისპირდება ძალას, რომელიც წლების განმავლობაში დევნის და ავიწროებს მათ.

"ომი თუ გინდათ, მიიღებთ", - მეორე სეზონის ბოლო სერია კლასტერის ლიდერის, ვილ გორსკის ამ სიტყვებით დასრულდა, როცა მათ მთავარი ბოროტმოქმედი, მისტერ ვისპერსი, გაიტაცეს და ფინალური ბრძოლა საკუთარ მოედანზე გადმოიტანეს.

ფანებისთვის ასეთი დასასრული მიუღებელი აღმოჩნდა და სერიალის აღდგენის მოთხოვნით მანიფესტი შეიქმნა. პროტესტს ვილ გორსკის როლის შემსრულებელი მსახიობი, ბრაიან სმიტი, ჩაუდგა სათავეში.

Netflix-მა განმარტა, რომ სტატისტიკა და რიცხვები არ იძლეოდა სერიალის გაგრძელების საშუალებას, რადგან სერიალის ხარჯები მის მოგებაზე გაცილებით მეტი იყო. მაგრამ ფანების აქტიურობის შედეგად, არხმა მიიღო გადაწყვეტილება სერიალის ორსაათიანი სპეციალური ეპიზოდი გადაეღოთ.