საქართველოს ფეხბურთის ფედერაციის ინფორმაციით, ამხანაგური მატჩი საქართველოს მოქალაქეებსა და დედაქალაქში სასწავლებლად ჩამოსულ სტუდენტებს შორის 14 აპრილს გაიმართება.

განცხადებაში ნათქვამია, რომ შეხვედრა იმ სტადიონზე შედგება, სადაც ნიგერიელ სტუდენტებს ფიზიკურად გაუსწორდნენ.

"მივესალმებით დედაქალაქის მერის, კახა კალაძის ინიციატივას, ჩატარდეს საფეხბურთო, ამხანაგური შეხვედრა 8 აპრილს, ბელიაშვილის ქუჩაზე მომხდარი ინციდენტის საპასუხოდ. მატჩი ჩვენს მოქალაქეებსა და დედაქალაქში სასწავლებლად ჩამოსულ სტუმრებს შორის შედგება. ფეხბურთის ფედერაცია გიწვევთ შეხვედრაზე, რომელიც 14 აპრილს, 18 საათზე, ბელიაშვილის ქუჩაზე მდებარე საფეხბურთო მოედანზე ჩატარდება, რადგან ყველას უნდა შეეძლოს ისიამოვნოს ფეხბურთით", - ნათქვამია განცხადებაში.

ამხანაგური თამაში "თამაში ყველასთვის" კამპანიის ფარგლებში გაიმართება.

თბილისის მერი, კახა კალაძე თბილისში, დიღმის მასივში მომხდარი ინციდენტის მონაწილეებს, შავკანიანებსა და ადგილობრივებს შორის, ამხანაგური მატჩის გამართვის ინიციატივით გამოვიდა.