საქართველოს საზოგადოებრივ საქმეთა ინსტიტუტმა მოწვეულ ლექტორს ზაზა სიამაშვილს ფეისბუკზე გამოქვეყნებული სექსისტური განცხადების გამო კონტრაქტი შეუწყვიტა. ამის შესახებ ინფორმაცია On.ge-ს GIPA-ში დაუდასტურეს.

GIPA-ს საზოგადოებასთან ურთიერთობის სამსახურის თინათინ კლდიაშვილის განცხადებით, უნივერსიტეტის დისციპლინურმა კომისიამ ზაზა სიამაშვილს ეთიკის კოდექსის ორი მუხლის უხეში დარღვევა დაუდგინა.

თინათინ კლდიაშვილის განმარტებით, კომისიის წევრებმა დაადგინეს, რომ ზაზა სიამაშვილის მიერ დაირღვა GIPA-ს ეთიკისა და ქცევის კოდექსის მე-3 მუხლის ორი ქვეპუნქტი. პირველი,სადაც უნივერსიტეტის აკადემიური პერსონალი და მოწვეული ლექტორები თავს იკავებენ სოციალური ქსელით ან მასობრივი მაუწყებლობის მეშვეობის საჯარო გამოსვლის განცხადების გაკეთებისგან, რაც შეუფერებელია ლექტორის სტატუსთან ან პირდაპირ ან ირიბად ზიანს აყენებს უნივერსიტეტის ან სტუდენტების პატივს, ღირსებას ან რეპუტაციას.

და მეორე ქვეპუნქტი, რომლის მიხედვითაც უნივერისიტეტის აკადემიური პერსონალი და მოწვეული ლექტორები ხელს უწყობენ სტუდენტებში დემოკრატიული სამართლიანობის ურთიერთპატივისცემას, ადამიანის უფლებათა დაცვის ღირებულების ჩამოყალიბებას.

"დისციპლინური კომიტეტის სარეკომენდაციო ხასიათის გადაწყვეტილება წარედგინა რექტორატს, რომელმაც იმსჯელა და რეკომენდაციაზე დაყრდნობით მიიღო გადაწყვეტილება ხელშეკრულების შეწყვეტის შესახებ", - უთხრა On.ge-ს თინათინ კლდიაშვილმა.

GIPA-ს მოწვეულმა ლექტორმა ზაზა სიამაშვილმა ფეისბუკის გვერდზე სექსისტური და ქალების შეურაცხმყოფელი პოსტი გამოაქვეყნა.