უმა თურმანმა რამდენიმე თვის წინ განაცხადა, რომ, ქალების სექსუალურად შევიწროების გახმაურებული ამბებით ის ძალიან გაბრაზებული იყო, თუმცა ამ თემაზე მაშინ იტყოდა მეტს, როცა ემოციები გადაუვლიდა.

საბოლოოდ, მსახიობმა ზუსტად მადლიერების დღეს კომენტარი გააკეთა:

"მადლიერი ვარ, რომ ცოცხალი ვარ, ყველა იმ ადამიანისთვის, ვინც მიყვარს და ასევე მათთვის, რომლებსაც გამბედაობა ჰყოფნით, სხვების გამო იბრძოლონ. ცოტა ხნის წინ ვთქვი, რომ გაბრაზებული ვიყავი და ამისთვის რამდენიმე მიზეზი მაქვს. #metoo ["მეც". ონლაინ კამპანია სექსუალური ძალადობის წინააღმდეგ], თუ ამას ჩემი სახის გამომეტყველებით ვერ ხვდებით. მე ვფიქრობ, რომ საკუთარ თავებს დრო უნდა მივცეთ, რომ სამართლიანები და ზუსტები ვიყოთ".

სწორედ ამ ფრაზის მერე თქვა თურმანმა, რომ მადლიერების დღეს ყველას ულოცავს, ვაინშტაინის გარდა. მსახიობი ვაინშტაინთან ტარანტინოს მიერ გადაღებულ ფილმებში [Kill Bill და Pulp Fiction], მონაწილეობისას თანამშრომლობდა.

თურმანმა ინსტაგრამზე მოკალი ბილიდან ზუსტად ის კადრი გამოიყენა, სადაც ამბობს "მე მოვკლავ ბილს".

ახლახანს კი New York Times-მა მსახიობის ინტერვიუ გამოაქვეყნა, სადაც ის ჰარვი ვაინშტაინთან დაკავშირებული ისტორიას იხსენებს. თურმანი ყვება, რომ 1994 წელს, ლონდონში, Pulp Fiction-ის პრემიერის დროს ვაინშტაინი სასტუმროს ნომერში შეუვარდა და მასზე იძალადა.

"ძირს დამაგდო, ცდილობდა ჩემს გაჩუმებას და დამორჩილებას. საშინელებებს აკეთებდა, იქცეოდა ისე, როგორც ცხოველი, მე კი ვერაფერს ვაკეთებდი.", - ყვება მსახიობი.

თურმანი იხსენებს, რომ ჰარვიმ მეორე დღეს ნომერში ყვავილები გაუგზავნა.

"დამიჯერეთ, მას თვითგადარჩენის ძალიან კარგი ინსტიქტები აქვს. ის მონსტრია, რომელიც ერთ დღეს გკლავს, შემდეგ კი თავს გაცოდებს. ჯერ კიდევ ფილმზე მუშობის დაწყებამდე დამიბარა პარიზში, თვის სასტუმროს ოთახში და სცენარს განიხილავდა მაშინ, როდესაც შხაპს იღებდა", - იხსენებს უმა.

მსახიობი ყვება იმასაც, რომ ძალადობის შემდეგ ვაინშტაინი მას ემუქრებოდა.

"ყველაფერს დაკარგავ, კარიერას, რეპუტაციას, ოჯახს და მეგობრებსაც კი, დაიმახსოვრე, ამას მე გპირდები - ეს იყო სიტყვები რომელსაც ჰარვი მიმეორებდა", - ამბობს უმა თურმანი.

ჰარვი ვაინშტაინი 90-ზე მეტმა ქალმა დაადანაშაულა სექსუალურ შევიწროებაში, თავდასხმასა და გაუპატიურებაში. მის საქმეს ლოს-ანჯელესის, ბევრლი ჰილზის, ნიუ-იორკისა და ლონდონის პოლიცია იძიებს.

გაიგეთ მეტი: ჰარვი ვაინშტაინის საქმე