ჭადრაკის შესახებ ასობით წლის განმავლობაში დაგროვებული ცოდნა გუგლის DeepMind-ის ხელოვნურმა ინტელექტმა გაშვებიდან სულ რაღაც 4 საათში ისწავლა, შემდეგ კი გააფართოვა.

ეს საოცარი პროგრამა AlphaZero ძალიან სწრაფად დაოსტატდა უძველეს თამაშში და მალევე გამოიგონა სრულიად ახალი სტრატეგიები, რომელთა ანალიზს ჭადრაკის დიდოსტატები ახლაც აკეთებენ.

ეს ალგორითმი ექსტრაორდინალური იმიტომაა, რომ ის ნულიდან სწავლობს. მას მხოლოდ თამაშის წესების საფუძველზე და საკუთარ თავთან მრავალი თამაშის შედეგად უნდა ესწავლა მოგება.

IBM-ის სუპერკომპიტერმა, Deep Blue-მ გარი კასპაროვი იმიტომ დაამარცხა 1997-ში, რომ ის დაპროგრამირებული იყო საუკეთესო სვლებით. განსხვავებით ამისა, AlphaZero-მ ყველაფერი თავისით ისწავლა.

ინგლისელმა ჭადრაკის ოსტატმა სიმონ უილიამსმა, რომელიც მართავს GingerGM საიტს, თქვა, რომ ეს მიღწევა „ისტორიის წიგნებშია ჩასაწერი“.

„2017 წლის 6 დეკემბერს, AlphaZero-მ სრული კონტროლი მოიპოვა ჭადრაკის სამყაროზე“ - თქვა მან.

დევიდ კრამალიმ, რომელიც ჭადრაკის შემეცნებით საიტ Chessable-ს მართავს, დაამატა: „ახლა უკვე ვიცით, ვინ არის ჩვენი ახალი ბატონი“.

„AlphaZero-ს მიერ ჩატარებულმა თამაშებმა აჩვენა, რომ მას შეუძლია დაუჯერებლად კრეატიული პოზიციური ბომბების გამოთვლა - სიღრმე, რომელიც ბევრად უფრო დიდია, ვიდრე ადამიანებს ან ჭადრაკის კომპიუტერებს ოდესღაც შეუქმნიათ.“

„უეჭველია, რომ ეს თამაშის რევოლუციას მოახდენს, მაგრამ დაფიქრდით იმაზე, თუ როგორ შეიძლება ამის გამოყენება ჭადრაკის გარეთ. ამ ალგორითმს შეუძლია ქალაქების, კონტინენტების, სამყაროების მართვა“.

DeepMind-ის გუნდს საბოლოოდ სურს, რომ ეს ალგორითმი ჯანდაცვის უზარმაზარ პრობლემებს მოარგოს. მათ სჯერათ, რომ პროგრამას შეუძლია დღეებსა და კვირებში შექმნას დაავადების განსაკურნებელი წამლები, რომელთაც ადამიანები ასობით წლების განმავლობაში ეძებენ.

კომპანიამ უკვე დაიწყო AlphaZero-თი ცილების დაგრეხის კვლევა და მათი ნაშრომი ძალიან მალე გამოქვეყნდება.

ის ცილები, რომელთა დაგრეხა სწორად არ ხდება, პასუხისმგებელია მომაკვდინებელ დაავადებებზე, როგორებიცაა ალცჰაიმერი, პარკინსონი და სხვა.