გუშინ კინოთეატრებში რ.ჯ. პალაციოს რომანის საოცრების ეკრანიზაცია გამოვიდა, რომელსაც უკვე უწინასწარმეტყველებენ დაჯილდოებების წარმატებულ სეზონსა და დიდ შემოსავალს.

გარდა მაყურებლის სიმპათიისა, ფილმის მიმართ დადებითად არის განწყობილი კინო კრიტიკა და თავად ავტორი.

ფილმში მთავარ როლებს ჯულია რობერტსი, ჯეიკობ თრამბლი და ოუენ უილსონი ასრულებენ.

ფილმის პრემიერაზე უილსონს ჟურნალისტმა ჰკითხა, თუ როგორი იყო ჯულია რობერტსთან ერთად მუშაობა.

"ჯულიასთან მუშაობა ჰარვარდში სწავლას ჰგავს, როდესაც საუკეთესო მასწავლებლის ჯგუფში მოხვდები და მის ყოველ ნაბიჯს, ყველა ქცევასა და გადაწყვეტილებას ისრუტავ. ჯულია შეუდარებელია, მთელი ჩემი სამსახიობო კარიერა მხოლოდ იმად ღირდა, რომ მის გვერდით მემუშავა, ეს ნებისმიერისთვის უდიდესი გამოცდილებაა", - ყვება უილსონი.

ინტერვიუს დროს ოუენმა ჯულიას საიდუმლოც გაამხილა და მოყვა თუ რას აკეთებს ჯულია, როცა გადაღების დროს შესვენება აქვს.

"ჯულიას ერთი საიდუმლოს გაგიმხელთ, რომელიც შეიძლება ბევრმა არც იცის - ის გადაღებების დროს, შესვენებისას ქსოვს და როდესაც ეს დავინახე, პირველი რაც გავიფიქრე იყო ის, თუ როგორი არაჩვეულებრივი ბებია იქნებოდა თავისი შვილიშვილებისთვის", - ამბობს უილსონი.

ჯულიას სიყვარული ქსოვისადმი ახალი ამბავი არ ყოფილა პრესისა და მისი ფანებისთვის. მსახიობი არაერთხელ შეუნიშნავთ საქსოვი ჩხირებით ხელში გადასაღებ მოედანსა თუ სხვა ადგილებში. მაგალითად ტომ ჰენქსმა ერთ-ერთ ინტერვიუში ისიც კი თქვა, რომ რობერტსმა მას ქსოვა ასწავლა. მსახიობი ხშირად დადის თავისივე მოქსოვილი ჟეკეთებითა თუ ჯემპრებით.

რობერტსისა და უილსონის ფილმის ნახვა უკვე შეგიძლიათ კინოთეატრებში.