აშშ-ის პრეზიდენტმა, დონალდ ტრამპმა Truth Social-ზე დაწერა, რომ უკრაინასა და რუსეთს შორის "ენერგეტიკული ზავი" დაიდო.

"ძალაში შედის დაუყოვნებლივ: რუსეთსა და უკრაინას შორის ომში გამოცხადდა ენერგეტიკული ცეცხლის შეწყვეტა. ორივე მხარე შეთანხმდა. არ დაარღვიოთ ის!" — წერს ტრამპი.

ტრამპის აღნიშნულ განცხადებას მალევე გამოეხმაურა ვოლოდიმირ ზელენსკი. უკრაინის პრეზიდენტის თქმით, მისთვის ეს შეთანხმება "სიახლე იყო" და დასძინა, რომ მისთვის შეეტყობინებინათ "როდის იწყება ცეცხლის შეწყვეტა”.

"ცეცხლის შეწყვეტის შესახებ განცხადება ჩემთვის სიახლე იყო. თუმცა, თუ რუსები თანახმა არიან ენერგეტიკულ ცეცხლის შეწყვეტაზე, უკრაინაც დათანხმდება. თუ პრეზიდენტმა ტრამპმა ეს პუტინთან შეათანხმა — გთხოვთ, შეგვატყობინოთ, როდის იწყება ცეცხლის შეწყვეტა — ჩვენ მზად ვართ და მივიღებთ მას," — განუცხადა ზელენსკიმ Axios-ს.

ტრამპის განცხადებამდე ვოლოდიმირ ზელენსკიმ ABC News-თან ინტერვიუში აღნიშნა, რომ უკრაინაში არჩევნები ჩატარდება, თუ რუსეთი 60-დღიან სრულ ცეცხლის შეწყვეტას დათანხმდება.

"გთხოვთ, პუტინს უთხრათ — მოგვცენ 2 თვე, 60-დღიანი სრული ცეცხლის შეწყვეტა და არჩევნებს დავაორგანიზებთ," — განაცხადა ზელენსკიმ ეთერში.

რა უძღვოდა ამ ყველაფერს წინ?

აშშ-ის პრეზიდენტმა დონალდ ტრამპმა განაცხადა, რომ დროა უკრაინას ახალი პრეზიდენტი ჰყავდეს. მან ასევე აღნიშნა, რომ ზელენსკი მთელი მსოფლიოსთვის პრობლემების შექმნას ცდილობს რუსული ნავთობგადამამუშავებელი ქარხნების სამიზნედ ქცევით.

ტრამპის თქმით, ვაშინგტონმა კიევს მოუწოდა, არ დაერტყა რუსული ქარხნებისთვის, რადგან რუსეთი მსოფლიოს დიზელის საწვავის მნიშვნელოვან ნაწილს აწვდის, მსგავსმა თავდასხმებმა კი შესაძლოა სერიოზული დეფიციტი გამოიწვიოს. მან დასძინა, რომ უკრაინამ არ უნდა შეუტიოს დიზელის საწვავის მარაგებს, რადგან მსოფლიო უკვე დგას პრობლემის წინაშე, რაც დიზელის წარმოებისთვის საჭირო გადამამუშავებელი სიმძლავრეების სიმცირითაა გამოწვეული.

ტრამპის საპასუხოდ ვოლოდიმირ ზელენსკიმ განაცხადა, რომ უკრაინა რუსეთის ნავთობის ობიექტებზე დარტყმებს მხოლოდ მას შემდეგ შეწყვეტს, რაც რუსეთი უკრაინის ენერგეტიკულ ინფრასტრუქტურაზე შეტევებს შეაჩერებს.