უკრაინის პრეზიდენტის, ვოლოდიმირ ზელენსკის განცხადებით, უკრაინა მას შემდეგ შეწყვეტს რუსეთის ნავთობის ობიექტებზე დარტყმებს, როცა რუსეთი უკრაინის ენერგეტიკულ ინფრასტრუქტურაზე დარტყმებს შეწყვეტს.

"ევროპაში ომის ნამდვილი მიზეზი რუსეთი და მხოლოდ რუსეთია. ენერგეტიკულ ინფრასტრუქტურაზე დარტყმების შეჩერება დღესვე არის შესაძლებელი, თუმცა პუტინს ეს არ სურს. უკრაინა მზად იქნება შეწყვიტოს დარტყმები რუსულ ნავთობგადამამუშავებელ ქარხნებზე, თუ რუსეთი შეწყვეტს დარტყმებს ჩვენს ენერგეტიკულ ინფრასტრუქტურაზე. დეესკალაციისკენ გადადგმული ნებისმიერი ნაბიჯი უნდა იყოს ორმხრივი და გამყარებული რეალური გარანტიებით," — წერს ზელენსკი.

აშშ-ის პრეზიდენტმა დონალდ ტრამპმა განაცხადა, რომ დროა უკრაინას ახალი პრეზიდენტი ჰყავდეს. დონალდ ტრამპმა ასევე განაცხადა, რომ ზელენსკი მთელი მსოფლიოსთვის პრობლემების შექმნას ცდილობს რუსული ნავთობგადამამუშავებელი ქარხნების სამიზნედ ქცევით.

ტრამპის თქმით, ვაშინგტონმა კიევს მოუწოდა, არ დაერტყა რუსული ქარხნებისთვის და არგუმენტად მოიყვანა ის ფაქტი, რომ რუსეთი მსოფლიოს დიზელის საწვავის მნიშვნელოვან ნაწილს აწვდის, მსგავსმა თავდასხმებმა კი შესაძლოა სერიოზული დეფიციტი გამოიწვიოს. მან დასძინა, რომ უკრაინამ არ უნდა შეუტიოს დიზელის საწვავის მარაგებს, რადგან მსოფლიო უკვე დგას პრობლემის წინაშე, რომელიც დიზელის წარმოებისთვის საჭირო გადამამუშავებელი სიმძლავრეების სიმცირითაა განპირობებული.