კატალონიის რეგიონალურმა პარლამენტმა ესპანეთისგან გამოყოფასა და დამოუკიდებლობას დაუჭირა მხარი, 70 ხმით 10-ის წინააღმდეგ.

კატალონიის პრეზიდენტმა კარლეს პუჩდემონიმ განაცხადა, რომ კატალონიამ დამოუკიდებლობის უფლება მოიპოვა. ოფიციალური პირების თქმით, პირველი ოქტომბრის რეფერენდუმში მონაწილეთა 90-მა პროცენტმა კატალონიის დამოუკიდებლობას მხარი დაუჭირა. ამასთანავე, რეფერენდუმში მოსახლეობის 42,3 პროცენტმა მიიღო მონაწილეობა.

კატალონიის დამოუკიდებლობის შესახებ პირველი ოქტომბრის რეფერენდუმი, რომელსაც არ აღიარებს მადრიდი და არც ევროკავშირი, ჯერ კიდევ ჩატარებამდე გამოაცხადა არაკონსტიტუციურად ესპანეთის საკონსტიტუციო სასამართლომ. ესპანეთის ერთიანობას დაუჭირეს მხარი გერმანიამ და საფრანგეთმა.

პარალელურად, ესპანეთის სენატში კატალონიის ავტონომიის შესაჩერებლად, კონსტიტუციის 155-ე მუხლის ამოქმედებაისთვის მსჯელობენ.

აღნიშნული მუხლის ამოქმედების შემთხვევაში, მადრიდს შეეძლება დაითხოვოს კატალონიის ლიდერი და პარლამენტი. ასევე, ესპანეთის ხელისუფლების დაქვემდებარებაში გადავა კატალონიის ბიუჯეტი, პოლიცია და საზოგადოებრივი მაუწყებელი.