ოთხშაბათს, ნეპალის მარშრუტით, მწვერვალზე ერთდროულად 274 მთამსვლელი ავიდა. ამ შედეგმა წინა რეკორდს გადააჭარბა, რომელიც 2019 წლის 22 მაისს დაფიქსირდა — მაშინ ევერესტი ნეპალის სამხრეთიდან 223-მა ადამიანმა დალაშქრა.

ნეპალის ტურიზმის დეპარტამენტის წარმომადგენელმა განაცხადა, რომ ალპინისტებმა მწვერვალის დასაპყრობად ხელსაყრელი ამინდით ისარგებლეს და ასვლა ადგილობრივი დროით დილის სამი საათიდან დაიწყეს. პროცესი დაახლოებით 11 საათის განმავლობაში გაგრძელდა.

ალპინისტები ევერესტისთვის მოსამზადებელი ეტაპის ფარგლებში ხუმბუს მყინვარზე ვარჯიშობენ. ნეპალი, 2 მაისი.

ფოტო: AP Photo/Pasang Rinzee Sherpa

საინტერესოა, რომ გასული წლის სექტემბრიდან ალპინისტებისთვის ნებართვის საფასური $11 000-დან $15 000-მდე გაიზარდა. მიუხედავად ამისა, 2026 წელს ევერესტზე ასვლის ნებართვა თითქმის 500 უცხოელ ალპინისტს აქვს მიღებული, რაც ასევე რეკორდული რაოდენობაა.

ევერესტის მზარდ პოპულარობასთან ერთად, სპეციალისტები გადატვირთულობასა და უსაფრთხოების რისკებზე საუბრობენ — განსაკუთრებით ე.წ. "სიკვდილის ზონაში", რომელიც ზღვის დონიდან 8,000 მეტრზე იწყება და ალპინისტებისთვის ჟანგბადის ნაკლებობის კრიტიკულ საფრთხეს ქმნის. ექსპერტების თქმით, ამ სიმაღლეზე დამატებითი ჟანგბადის გამოყენების მიუხედავად, 20 საათზე მეტხანს დარჩენა არ არის რეკომენდებული.