უკრაინის მიერ ქართული ოცნების მაღალჩინოსნებისთვის დაწესებული სანქციების შემდეგ, უკრაინის პრეზიდენტი ვოლოდიმირ ზელენსკი პირველად შეხვდა საქართველოს მთავრობის მეთაურ ირაკლი კობახიძეს ერევანში ევროპის პოლიტიკური თანამეგობრობის სამიტზე. ამის შესახებ მან სოციალურ ქსელში დაწერა.

ზელენსკიმ აღნიშნა, რომ კობახიძეს ერევანში ევროპის პოლიტიკური თანამეგობრობის სამიტის ფარგლებში შეხვდა.

"ჩვენს ქვეყნებს შორის მართლაც არსებობს გადაუჭრელი საკითხები. მნიშვნელოვანია დიალოგი ყველა დონეზე. უკრაინა ყოველთვის პატივს სცემდა და პატივს სცემს საქართველოს, მის სუვერენიტეტს და მის ხალხს. ჩვენ გავაგრძელებთ ჩვენი თანამშრომლობის განვითარებას", — დაწერა ზელენსკიმ.

საქართველოს მთავრობამ განაცხადა, რომ შეხვედრა უკრაინული მხარის ინიციატივით გაიმართა. ირაკლი კობახიძემ ჟურნალისტებთან საუბრისას თქვა, რომ "ზელენსკისთან იყო მეგობრული და საინტერესო საუბარი".

"შინაარსზე ვერ ვიტყვი ვერაფერს, გამომდინარე იქიდან, რომ ეს იყო დახურული შინაარსის, ფორმატის შეხვედრა. თუმცა, ზოგადად შემიძლია გითხრათ, რომ ეს იყო მეგობრული და საინტერესო საუბარი, რაც შედგა ჩვენს შორის. ...თავად პრეზიდენტმა გამოხატა ეს ინიციატივა, ჩვენ მყისიერად დავუდასტურეთ ჩვენი მზაობა და გავისაუბრეთ ორმხრივ ურთიერთობებთან დაკავშირებით. არსებითად ეს იყო ამ საუბრის საგანი და კიდევ ერთხელ ვიტყვი, რომ იყო საინტერესო საუბარი ჩვენს შორის და ძალიან მეგობრული.

...ზოგადად, შემიძლია გითხრათ, რომ უკრაინა არის ჩვენთვის მეგობარი ქვეყანა. ჩვენ გვაქვს ტრადიციული ისტორიული მეგობრობა, რაც აკავშირებს ჩვენს ქვეყნებს, ჩვენს ხალხებს და ამას უნდა გავუფრთხილდეთ მაქსიმალურად და ეს იყო, მათ შორის, ის სულისკვეთება, რაც პრეზიდენტს გავუზიარე', — განაცხადა ირაკლი კობახიძემ სომხეთში უკრაინის პრეზიდენტ ვოლოდიმირ ზელენსკისთან შეხვედრაზე.

შეგახსენებთ, რომ ირაკლი კობახიძეს და საქართველოს მმართველი პარტიის კიდევ რამდენიმე წარმომადგენელს უკრაინამ 2024 წელს 10-წლიანი სანქციები დაუწესა.

უკრაინული გამოცემა წერს, რომ ოფიციალურ კიევსა და თბილისს შორის ურთიერთობები ბოლო წლებში დაძაბული დარჩა, სხვა მიზეზებთან ერთად, რუსეთ-უკრაინის ომთან დაკავშირებით მმართველი პარტია ქართული ოცნების პოზიციისა და "საქართველოს მეორე ფრონტად გადაქცევის" სავარაუდო გეგმების შესახებ მუდმივი ბრალდებების გამო. საქართველოს უკრაინის ელჩი თითქმის ოთხი წლის განმავლობაში არ ჰყავდა, სანამ ამ თანამდებობაზე მიხეილ ბროდოვიჩი 2026 წლის იანვარში არ დაინიშნა.