თბილისის საქალაქო სასამართლომ აქტივისტი მარიამ მეყანწიშვილი, 9 აპრილის მემორიალთან თბილისის საკრებულოს წევრის, ბექა დავითულიანისთვის სიტყვიერი შეურაცხყოფის მიყენების ფაქტზე, სამართალდამრღვევად ცნო და 4 000-ლარიანი ჯარიმა დააკისრა. გადაწყვეტილება მოსამართლე თორნიკე ქოჩქიანმა მიიღო.

აქტივისტი "რადიო თავისუფლებასთან" საუბრისას აცხადებს, რომ ბექა დავითულიანს ფიზიკური შეურაცხყოფისთვის უჩივლებს.

მას შემდეგ, რაც 9 აპრილს დაღუპულთა მემორიალთან მისულ ქართული ოცნების ლიდერებსა და საპარლამენტო წარმომადგენლებს საზოგადოება პროტესტით შეხვდა, მოქალაქეებმა პროტესტი თბილისის საკრებულოს წევრების მიმართაც გამოხატეს.

იმ დროს, როდესაც ბექა დავითულიანი ჟურნალისტებს ინტერვიუს აძლევდა, მეყანწიშვილი მას წინ გადაუდგა და სკანდირებდა — "რუსო", "მონავ" და "ქვეყნის მოღალატევ". დავითულიანმა თავდაპირველად არ უპასუხა აქტივისტს, მოგვიანებით კი ხელი მოჰკიდა და გვერდზე გაათრია.

15 აპრილს შედგენილ სამართალდარღვევის ოქმში წერია: "2026 წლის 9 აპრილს მოქალაქე მარიამ მეყანწიშვილმა სიტყვიერი შეურაცხყოფა მიაყენა საკრებულოს დეპუტატ ბექა დავითულიანს, კერძოდ, უწოდა "მონა", "რუსი", "მოღალატე" და "ქვეყნის გამყიდველი". (წყარო "რადიო თავისუფლება").

შეგახსენებთ, რომ საქართველოს სახელმწიფო-პოლიტიკური თანამდებობის პირის სიტყვიერი შეურაცხყოფა, ლანძღვა-გინება, შეურაცხმყოფელი გადაკიდება ან/და სხვაგვარი შეურაცხმყოფელი ქმედება სამსახურებრივი მოვალეობის შესრულების დროს, ან სამსახურებრივი მოვალეობის შესრულებასთან/საქმიანობასთან დაკავშირებით, იწვევს დაჯარიმებას 1500-დან 4000 ლარამდე ოდენობით, ან ადმინისტრაციულ პატიმრობას 45 დღემდე ვადით.