გავრცელებული ინფორმაციით, ტომ ჰარდი სავარაუდოდ რამდენიმე წლით ჩამოშორდება კინოინდუსტრიას. ისეთი ფილმების შემდეგ, როგორიცაა ვენომი, შეშლილი მაქსი: მრისხანების გზა და ტაბუ, მსახიობს სერიოზული პრობლემები დაეწყო, მძიმე ფიზიკურმა როლებმა მის სხეულს სერიოზული კვალი დაატყო.

ჰარდიმ უკვე დაიწყო დასვენება, ამ თვეში ის ბარბადოსზე მეუღლესთან, შარლოტ რაილისთან ერთად დააფიქსირეს.

"უკვე ჩავიტარე მუხლის ორი ოპერაცია, მაქვს ხერხემლის თიაქარი და იშიასი. ყველაფერი იშლება და უკეთესობისკენ არაფერი წავა", — განაცხადა ჰარდიმ გასულ წელს Esquire-თან ინტერვიუში.

ამ ეტაპზე მსახიობის გრაფიკი თავისუფალია. MobLand-ის მეორე სეზონის გადაღებები უკვე დასრულებულია, სხვა სამომავლო პროექტების შესახებ კი ინფორმაცია ჯერჯერობით არ ვრცელდება.

მიუხედავად იმისა, რომ მისი როლები ფიზიკურად დამქანცველია, ჰარდის მაინც "მძიმე" პერსონაჟების განსახიერება ურჩევნია. The Hollywood Reporter-თან ინტერვიუში მან აღნიშნა, რომ უარს ამბობს ისეთ ფილმებში მონაწილეობაზე, რომლებიც მისთვის დამახასიათებელ სტილში არ ჯდება. მსახიობი, სავარაუდოდ, არც მომავალში აპირებს მსუბუქ ჟანრებში ძალების მოსინჯვას. "მგონი, რომანტიკულ კომედიებს არ ვუხდები", — იხუმრა მან.

"არ ვიცი, უბრალოდ მგონია, რომ ჩემი საქმე არაა. თუმცა, თუ რამე საინტერესო და გასართობი გამოჩნდება, შესაძლოა დავთანხმდე. ჯერჯერობით ისეთი არაფერი შემოუთავაზებიათ, რაზეც ვიტყოდი, რომ ამის გაკეთება ძალიან მინდა. ასე რომ, დაველოდები. ჯერჯერობით მსგავსი არაფერი მომხდარა", — დასძინა ჰარდიმ.