ტრამპის ცნობილი მოკავშირის, ლორა ლუმერის სარჩელი ბილ მარისა და HBO-ს წინააღმდეგ ფედერალურმა მოსამართლემ არ დააკმაყოფილა. მოსამართლემ დაადგინა, რომ გადაცემა Real Time-ის წამყვანის ხუმრობა დაცული სიტყვის თავისუფლების ფარგლებში ჯდებოდა და არა ცილისწამების კატეგორიაში.

2024 წლის 13 სექტემბრის ეთერში მარმა ივარაუდა, რომ ლუმერი (ულტრამემარჯვენე აქტივისტი, რომელსაც პრეზიდენტ ტრამპთან პირდაპირი კავშირი აქვს) შესაძლოა პრეზიდენტთან სექსუალურ ურთიერთობაში ყოფილიყო.

ლუმერმა კომიკოსსა და HBO-ს (რომლის მფლობელია Warner Bros. Discovery, CNN-ის მშობელი კომპანია) უჩივლა. იგი ამტკიცებდა, რომ ამ კომენტარმა შელახა მისი რეპუტაცია ტრამპის გარემოცვაში და სამუშაო შესაძლებლობა დააკარგვინა.

ლორა ლუმერი ულტრამემარჯვენე ამერიკელი აქტივისტი და კონსპირაციული თეორიების მომხრეა, რომელიც დონალდ ტრამპის ერთ-ერთ ყველაზე რადიკალურ მხარდამჭერად ითვლება

ფოტო: Le Monde

აშშ-ის საოლქო მოსამართლე ჯეიმს მუდი უმცროსმა საქმე დახურა. მისი განმარტებით, ეპიზოდის სრული კონტექსტის გათვალისწინებით, ნებისმიერი "გონიერი" მაყურებელი მიხვდებოდა, რომ მარი ხუმრობდა და არა ფაქტს აცხადებდა.

მოსამართლემ დაადგინა, რომ ლუმერმა, რომელსაც სასამართლო საჯარო პირად განიხილავს, ვერ შეძლო "ბოროტი განზრახვის" დამტკიცება, რაც აუცილებელი კომპონენტია ცილისწამების საქმეებში. იმ პერიოდში ლუმერისა და ტრამპის სიახლოვის შესახებ მედიაში ისედაც ბევრი იწერებოდა, ამიტომ მოსამართლის თქმით, არ არსებობს მტკიცებულება, რომ მარმა შეგნებულად გაავრცელა მცდარი ინფორმაცია.

მუდის განმარტებით, მაშინაც კი, თუკი ნათქვამს ფაქტად აღვიქვამდით, ცილისწამების საქმე მაინც ვერ შედგებოდა, რადგან ლუმერმა ვერ დაამტკიცა რეალური ზიანი. მან ვერ დაასახელა ვერავინ, ვინც ამ ნათქვამს დაუჯერა და ვერც რეპუტაციული ან ფინანსური ზარალი აჩვენა. პირიქით, ლუმერმა ჩვენებაში თავადვე აღნიშნა, რომ მისი შემოსავალი 2024 წელს წინა წლებთან შედარებით გაიზარდა. ის კვლავ ხვდება პრეზიდენტ ტრამპს, პრეზიდენტი ისევ ეკითხება აზრს სხვადასხვა საკითხზე და ლუმერი დღემდე იღებს მოწვევებს თეთრ სახლში. მოსამართლის თქმით, მტკიცებულებები სამსახურის დაკარგვის შესახებ მხოლოდ ვარაუდებს ეყრდნობოდა.