აღმოსავლეთმცოდნე, პროფესორი გიორგი სანიკიძე სოციალურ ქსელში წერს, რომ ირანის რევოლუციისადმი მიძღვნილ საზეიმო მიღების მოსაწვევზე The 410thy Anniversary of the Arrival of Georgians in Iran აწერია, რაც საქართველოში შაჰა აბასის ლაშქრობების დროს ემთხვევა.

"საკმაოდ დიდი გამოხმაურება მოჰყვა ირანის რევოლუციისადმი მიძღვნილ საზეიმო მიღებაზე ხელისუფლების წარმომადგენლების მისვლას და მისასალმებელი სიტყვით გამოსვლასაც. ჩემი პროფესიიდან გამომდინარე, მოწვევა მეც მივიღე, მაგრამ დღეს ირანში არსებული სიტუაციიდან გამომდინარე, არ ჩავთვალე მიზანშეწონილად მისვლა. ამ პოსტით კი ერთ მეტად საყურადღებო ნიუანსს მინდა გავუსვა ხაზი. მოწვევის კონვერტს აწერია The 410thy Anniversary of the Arrival of Georgians in Iran — გამოდის 1616 წელი — შაჰა აბასის ლაშქრობების დროს (1613-1617) კახეთის მოსახლეობის დიდი ნაწილის გაწყვეტა ირანელების მიერ და გადარჩენილების მნიშვნელოვანი ნაწილის ძალადობრივი გადასახლება ირანში. ანუ, ირანული მხარე "გვაზეიმებს“ საქართველოს ისტორიაში ერთ-ერთ ყველაზე ტრაგიკულ მოვლენას და ამგვარ შეურაცხყოფაზე ხელისუფლებას არათუ რეაქცია არ აქვს, არამედ საგარეო საქმეთა მინისტრის მოადგილე მისასალმებელი სიტყვითაც კი გამოდის. მემგონი, კომენტარი ზედმეტია..." — წერს გიორგი სანიკიძე.

ცნობისთვის, 11 თებერვალს, სასტუმრო "პარაგრაფში" ირანის საელჩომ, ირანის ისლამური რევოლუციის გამარჯვების დღესთან დაკავშირებით მიღებას უმასპინძლა, რომელსაც "ოცნების" საგარეო საქმეთა მინისტრის მოადგილე ლაშა დარსალია და სახელმწიფო დაცვის სპეციალური სამსახურის უფროსი, ანზორ ჩუბინიძე დაესწრო.