საქართველოს მე-3 პრეზიდენტი სალომე ზურაბიშვილი "ოცნების" ხელისუფლების მიერ გრანტების კანონში დაგეგმილ საკანონმდებლო ცვლილებებს ეხმაურება. მისი თქმით, აღნიშნული ცვლილებები "მმართველი პარტიის დაუნდობელი ნაბიჯია თავისუფალი პოლიტიკური ცხოვრების ჩასახშობად და საქართველოს რუსულ მოდელზე გადასაყვანად".

"#ტერორისაქართველოში ახალი რეპრესიული კანონპროექტი პოლიტიკური პარტიის წევრობას კრძალავს იმ პირებისთვის, რომლებიც მუშაობდნენ უცხოური დაფინანსების მქონე არასამთავრობო ორგანიზაციებში! ეს არის მმართველი პარტიის დაუნდობელი ნაბიჯი თავისუფალი პოლიტიკური ცხოვრების ჩასახშობად და საქართველოს რუსულ მოდელზე გადასაყვანად", — წერს სალომე ზურაბიშვილი.

ცნობისათვის, 28 იანვარს გამართულ ბრიფინგზე ფრაქცია ქართული ოცნების თავმჯდომარემ, ირაკლი კირცხალიამ განაცხადა, რომ "მოქალაქეთა პოლიტიკური გაერთიანებების შესახებ" ორგანულ კანონში პოლიტიკური პარტიის წევრობის შეზღუდვასთან დაკავშირებული ცვლილებები ხორციელდება: პირს, რომელიც დასაქმებულია ორგანიზაციაში, რომლის შემოსავლის 20%-ზე მეტი წლის განმავლობაში მიღებულია უცხოური ძალისგან, პოლიტიკური პარტიის წევრობა 8 წლის ეკრძალება.