"ეს ნამდვილად მოახდენს გავლენას იმაზე, როგორ ვყვებით ისტორიებს", — ამბობს Netflix-ის ახალი კრიმინალური თრილერის, The Rip-ის ვარსკვლავი მეთ დეიმონი.

Netflix-მა ბოლო ათწლეულის განმავლობაში დიდი როლი ითამაშა კინოინდუსტრიის შეცვლაში და, მეთ დეიმონის თქმით, კიდევ უფრო მეტ ცვლილებასაც გეგმავს.

მსახიობმა ცოტა ხნის წინ ისაუბრა იმაზე, როგორ შეცვალა სტრიმინგპლატფორმამ ფილმების შექმნის გზა, კონკრეტულად, დიალოგებში სიუჟეტის გამეორების მოთხოვნით, იმის გამო, რომ ბევრი მაყურებელი ფილმებს სახლში უყურებს და არა კინოთეატრში.

"IMAX-ში ვნახე One Battle After Another, ამ განცდას არაფერი შეედრება", — თქვა დეიმონმა და ოჯახთან ერთად კინოთეატრში წასვლა გაიხსენა, როცა ბენ აფლეკთან ერთად ჯო როგანის პოდკასტს ესტუმრა — "უცნობებთან ერთად ხარ, მაგრამ მაინც შენიანებთან და ამ გამოცდილებას ერთად იზიარებთ. ყოველთვის ვამბობ, ეს ეკლესიაში წასვლას ჰგავს: განსაზღვრულ დროს მიდიხარ. არ გელოდება.

სახლში ფილმის ყურება კი სულ სხვა ამბავია. ოთახში უყურებ, შუქი ანთებულია, გარშემო ათასი რაღაც ხდება, ბავშვები დარბიან, ძაღლები დარბიან. ეს სრულიად სხვა დონის ყურადღებაა, რომლის დათმობაც შეგიძლია".

შეიძლება დიდი სცენა პირველ ხუთ წუთში გვქონდეს? გვინდა, ხალხი საყურებლად დარჩეს

დეიმონის თქმით, სწორედ ამ განსხვავებული ყურების ჩვევების გამო სურს Netflix-ს, რომ კინოს შემქმნელებმა ისტორიები სხვაგვარად მოყვნენ.

"ფილმის სტანდარტული ფორმულა, რაც ჩვენ ვისწავლეთ, ასეთია: ჩვეულებრივ სამი დიდი სცენაა, ერთი პირველ აქტში, ერთი მეორეში და ერთიც მესამეში", — განმარტა დეიმონმა — "ფულის დიდ ნაწილს მესამეზე ხარჯავ, ეს ფინალია. ახლა კი ისინი გვეკითხებიან: "შეიძლება დიდი სცენა პირველ ხუთ წუთში გვქონდეს? გვინდა, ხალხი საყურებლად დარჩეს".

მისივე თქმით, პლატფორმა ასევე ითხოვს ისეთ სტრუქტურას, სადაც "სიუჟეტი დიალოგებში სამი-ოთხჯერ მეორდება, რადგან ხალხი ყურებისას ტელეფონს იყენებს. ეს ნამდვილად დაიწყებს ზეგავლენას იმაზე, როგორ ვყვებით ისტორიებს", — ივარაუდა დეიმონმა.

თუმცა აფლეკმა აღნიშნა, რომ სტრიმინგზე გამოშვებული ნამუშევრებისთვის ეს ერთადერთი გზა არ არის მაყურებლის შესანარჩუნებლად.

"მაგრამ მერე Adolescence-ს უყურებ და იქ არაფერი მსგავსი არ არის გაკეთებული", — თქვა აფლეკმა, — "და ძალიან მაგარია. თან ბნელიც არის. ტრაგიკული და ინტენსიური. ეს არის კაცზე, რომელიც იგებს, რომ მის შვილს მკვლელობაში ადანაშაულებენ. კადრები დიდხანს აჩვენებს მათი თავების უკანა მხარეს. მანქანაში სხდებიან და არავინ არაფერს ამბობს".

დეიმონის აზრით, ასეთი პროექტები გამონაკლისია, თუმცა აფლეკი ამტკიცებს, რომ მინი-სერიალის წარმატება ადასტურებს: მაყურებლის ყურადღების შესანარჩუნებლად აუცილებელი არ არის სიუჟეტის "კოვზით ჭმევა".

"ეს აჩვენებს, რომ ამის გაკეთება საერთოდ არ გჭირდება, რომ ხალხმა გიყუროს", — თქვა აფლეკმა და დაამატა, რომ სტრიმინგი ეგზისტენციურ საფრთხეს არ წარმოადგენს და თხრობის ფორმის ცვლილება გარდაუვალი იყო, რადგან კინოთეატრებში სულ უფრო ნაკლები ადამიანი დადის.

თუმცა, მისი თქმით, კინოთეატრები არასდროს გახდება მოძველებული: "ხალხი მაინც ივლის კინოში, ზუსტად იმ მიზეზის გამო, რაც შენ თქვი. ეს მაგარი საქმეა. გარანტიას გაძლევ, რაც არ უნდა მოხდეს The Odyssey-ს აუცილებლად კინოთეატრში ვნახავ".

მეთ დეიმონი და ბენ აფლეკი ნეტფლიქსის ახალ ფილმში The Rip

ფოტო: Netflix

Netflix-ის ახალ ფილმში The Rip აფლეკი და დეიმონი მაიამის პოლიციელებს თამაშობენ, რომელთა ერთგულებაც კითხვის ნიშნის ქვეშ დგება, როცა ნანგრევებად ქცეულ სახლში ნარკოდილერების მილიონობით დოლარს პოულობენ. როლებისთვის მოსამზადებლად ისინი ნამდვილ პოლიციელებთან მუშაობდნენ.

The Rip-ში ასევე თამაშობენ კაილ ჩენდლერი, სტივენ იეუნი და ოქროს გლობუსზე ახლახან დაჯილდოებული ტიანა ტეილორი.

ასევე ნახეთ: საუკეთესო ფილმები და სერიალები, რომლებიც იანვარში Netflix-ზე გამოდის