სანქცირებულმა შს მინისტრის მოადგილემ, ალექსანდრე დარახველიძემ კომენტარი გააკეთა გავრცელებულ ინფორმაციაზე იმის შესახებ, რომ "ტვ პირველის" ჟურნალისტი გიორგი მამნიაშვილი იზოლატორში გააშიშვლეს.

დარახველიძე აცხადებს, რომ "შემოწმება მოიცავს გაშიშვლების კომპონენტსაც".

"შემოწმება მოიცავს გაშიშვლების კომპონენტსაც. გათვალისწინებულია დაწესებულებაში შესახლების დროს. ეს არის სავალდებულო კომპონენტი იმისთვის, რომ თუკი არსებობს რაიმე დაზიანებები მის სხეულზე, დროულად აღიწეროს ექიმის მხრიდან და ეცნობოს დაზიანებები შესაბამის საგამოძიებო სამსახურს. ეს არის ჩვენი ვალდებულება, რომელიც უნდა შესრულდეს იქიდან გამომდინარე, რომ ჩვენ ნაკისრი გვაქვს სტამბოლის პროტოკოლის მიხედვით და კანონმდებლობით არის გათვალისწინებული. გარდა ამისა, თუ რაიმე ტიპის გადაცდომა მოხდა პოლიციის მხრიდან, ექიმი ვალდებულია, თუკი ეს ინფორმაცია მიღო, დროულად აცნობოს საგამოძიებო ორგანოს და მას ექნება საშუალება, მიაწოდოს გამოძიებას შესაბამისი ინფორმაცია, ოღონდ ამას აწარმოებდეს დამოუკიდებელი უწყება და არა შსს",— განაცხადა დარახველიძემ.

მისივე თქმით, გიორგი მამნიაშვილს პოლიციის დაუმორჩილებლობა და წინააღმდეგობის გაწევა ედება ბრალად.

"ამ შემთხვევაში, ადგილი ჰქონდა პოლიციის დაუმორჩილებლობას და მისთვის წინააღმდეგობის გაწევას. შესაბამისად, იგი დაკავებულია ადმინისტრაციულ სამართალდარღვევათა კოდექსის შესაბამისად. ჩვენ ყველა მტკიცებულებას წარვადგენთ სასამართლოში, რომელიც ადასტურებს მისი მხრიდან ადმინისტრაციულ გადაცდომის ჩადენის ფაქტს, სადაც განხილული იქნება და კონკრეტულ მხარეებს შესაბამისი მტკიცებულება მიეწოდება", — განაცხადა დარახველიძემ (კომენტარებს IPN ავრცელებს).

ტვ პირველის" ჟურნალისტი გიორგი მამნიაშვილი 22 ნოემბერს დააკავეს. მისი ადვოკატის, თორნიკე მიგინეიშვილის განცხადებით, გიორგი მამნიაშვილი "იზოლატორში გააშიშვლეს და ბუქნები აკეთებინეს. ორივე ზემოთ აღნიშნული ქმედება კანონით არის პირდაპირ აკრძალული".