"ლელო-ძლიერი საქართველოს" ერთ-ერთი ლიდერის, თაზო დათუნაშვილის ინფორმაციით, საარჩევნო დარღვევები მთელი ქვეყნის მასშტაბით ფიქსირდება. მისი თქმით, 12:00 საათის მდგომარეობით, საარჩევნო პროცესში აღმოჩენილ დარღვევებზე 100-ზე მეტი საჩივარი დაიწერა.

იგი ამბობს, რომ დარღვევის ძირითადი ტიპებია: ე.წ. კარუსელი, საარჩევნო უბანთან ამომრჩევლის მოსყიდვა, ასევე მათი იძულება, რომ მივიდნენ და ხმა მისცენ და ვიდეომონიტორინგისთვის ხელის შეშლა. დათუნაშვილის ინფორმაციით, თბილისის საარჩევნო უბნებზე კამერებს აზიანებენ და რაკურსს უცვლიან.

"12:00 საათის მდგომარეობით, საქართველოს მასშტაბით, მათ შორის თბილისში მიმდინარე საარჩევნო პროცესში აღმოჩენილ დარღვევებზე დაწერილია 100-ზე მეტი საჩივარი. ამის პარალელურად, 12:00 საათისთვის აქტივობა არის ძალიან მაღალი, ამისთვის კიდევ ერთხელ მადლობას ვუხდი ოპოზიციურ ამომრჩეველს, ვისაც ესმის ამ ბრძოლის ველის მნიშვნელობა და ვინც მოვიდა საარჩევნო ყუთებთან. მინდა მოვუწოდო ყველა ოპოზიციურად განწყობილ ადამიანს, ვისაც აღარ უნდა იცხოვროს რუსული სცენარით, რუსულ ქალაქებსა და სოფლებში, რომელსაც უნდა, რომ ამ ქვეყანამ გააგრძელოს ნორმალური ცხოვრება სწორი მიმართულებით, აუცილებლად მიხვიდეთ საარჩევნო უბნებზე და მოიხადოთ თქვენი სამოქალაქო ვალი. "ქართული ოცნების" აგონიური მდგომარეობა ნიშნავს, რომ მათ აქვთ პრობლემები. თქვენი აქტივობა შეიძლება იყოს გადამწყვეტი, ამიტომ აუცილებლად მოდით არჩევნებზე!

რაც შეეხება დარღვევებს, მთავარ პრობლემად იკვეთება ის, რომ თბილისის ათობით უბანზე კამერებს აზიანებენ, რაკურსს უცვლიან, ცდილობენ, რომ გააჩერონ. წერენ უცნაურ საჩივრებს, რომ კამერის გადაღება გააჩერონ. სერიოზულ პრობლემას უქმნით კამერები. ცალსახად იკვეთება ტენდენცია, რომ ისინი ატრიალებენ თბილისის ბევრ უბანზე ე.წ. საარჩევნო კარუსელს. ასევე, მინდა გამოვეხმაურო იმ მტკნარ და ბინძურ ტყუილს, რომელსაც ცენტრალური საარჩევნო კომისიის წარმომადგენლები ახლა ავრცელებენ, თითქოს საჩივრები არ არის დაწერილი. 100-ზე მეტი საჩივარია დაწერილი და ცესკო-ს ყაჩაღებს აქვთ გაცემული ბრძანება, კალანდარიშვილი ყაჩაღის თამადობით, დირექტივაა კომისიებზე, რომ არ მიიღონ საჩივრები, რომ არ მიიღონ ჩვენ მიერ დაკისრებული საჩივრები და ბევრ უბანზე საჩივრები არ განიხილება.

ყველაფერს ვაკეთებთ, რომ ეს საჩივრები იქნას მიღებული. თუმცა კალანდარიშვილი ცდილობს დაბლოკოს ეს საჩივრები მთელი საქართველოს მასშტაბით. ეს ტენდენცია იკვეთება მთელი საქართველოს მასშტაბით. დარღვევის ტიპებია: ე.წ. კარუსელი, იკვეთება ტენდენცია განსაკუთრებით საქართველოს რეგიონებში, რომ ტექნიკური სარეგისტრაციო აპარატები სპეციალურად გააფუჭონ, რადგან ჟურნალით აღრიცხვაზე გადავიდნენ და ამით გაამარტივონ გაყალბების მეთოდები. აგრეთვე კონკრეტული უბნები დავასახელეთ, სადაც ჩამოყენებული ჰყავთ ე.წ. სამარშრუტო ტაქსები და უბნებთან ახლოს არიგებენ ფულს და აწარმოებენ ამომრჩევლის მოსყიდვას. ეს ტენდენცია იკვეთება თბილისშიც, ბათუმშიც, გორშიც, თელავშიც და ბევრ სხვა საარჩევნო ოლქსა და უბანზე.

ამის მიღმა, ერთ-ერთი მთავარი ტრადიცია, რომელიც "ქართულ ოცნებაში" აქვს, ეს არის ამომრჩევლის აღრიცხვა და ამ ამომრჩევლის იძულება, რომ საარჩევნო უბნებზე მიიყვანონ. ეს ხდება აბსოლუტურად უკანონო გზით. მათ შორის, სოციალურად დაუცველებს აშანტაჟებენ სოციალური დახმარების მოხსნით და ეძახიან "ქართული ოცნების" სასარგებლოდ მისცენ ხმა. „ქართულ ოცნებას“ აქვს სერიოზული პანიკა და ყველა მეთოდით ცდილობს, რომ გააყალბოს საქართველოს მოქალაქეების არჩევანი. ეს კიდევ ერთი დასტურია იმის, რომ ეს ბრძოლა არის სწორი ბრძოლა, მნიშვნელოვანი ბრძოლა და საქართველოს მოქალაქეები, რომლებსაც არ უნდათ ივანიშვილის საქართველოში ცხოვრება, აუცილებლად უნდა გამოვიდნენ არჩევნებზე და მოიხადონ სამოქალაქო ვალი", — განაცხადა თაზო დათუნაშვილმა.

4 ოქტომბრის თვითმმართველობის არჩევნებში მონაწილეობაზე უარს ამბობს 8 ოპოზიციური პარტია, მათ შორის ის 2 კოალიცია — ცვლილებისთვის და ნაციონალური მოძრაობა, რომლებმაც ცესკო-ს მონაცემებით, 2024 წლის ოქტომბრის არჩევნებში ოპოზიციურ პარტიებს შორის ყველაზე მეტი ხმა მიიღეს.

ბოიკოტის რეჟიმში მყოფი ოპოზიციური პარტიები აცხადებენ, რომ არჩევნებში შესვლა ოცნებისთვის ლეგიტიმაციის მიცემას ნიშნავს და სასურველ ციფრებს ოცნება მაინც დაიწერს. თვითმმართველობის არჩევნების დღეს, 4 ოქტომბერს ოპოზიციური პარტიები და აქტივისტები რუსთაველზე აქციას გამართავენ. ორგანიზატორებს შორის არიან ნაციონალური მოძრაობის და მოძრაობა რუსთაველის გამზირის წარმომადგენლები. ისინი აცხადებენ, რომ ამ დღეს ოცნების ხელისუფლებას "მშვიდობიანად დაამხობენ".