რუსეთის საგარეო საქმეთა მინისტრი სერგეი ლავროვი მოლდოვაში გამართულ საპარლამენტო არჩევნებს ეხმაურება. ის აცხადებს, რომ მოლდოვის საპარლამენტო არჩევნები გაყალბებული იყო, თუმცა, მიუხედავად ამისა, პატრიოტულმა ოპოზიციამ ქვეყნის შიგნით მმართველ პარტიაზე მეტი ხმა დააგროვა. ამის შესახებ რუსეთის საგარეო საქმეთა მინისტრმა სერგეი ლავროვმა სოჭში ჟურნალისტებს განუცხადა.

რუსეთის საგარეო საქმეთა სამინისტროს ხელმძღვანელის თქმით, მოლდოვას პრეზიდენტი მაია სანდუ დიდი ხანია ანტირუსული რიტორიკის წარმომადგენელია.

"არჩევნები გაყალბებული იყო. უბრალოდ გაოგნებული ვარ, როგორ შეიძლებოდა ამომრჩევლის ხმების ასე აშკარად მანიპულირება. მაგრამ ყველაზე მნიშვნელოვანი ის არის, რომ მანიპულაციების მიუხედავად, დნესტრისპირეთის მაცხოვრებლებისთვის ხმის მიცემის დაბრკოლებების შექმნით — ხიდები ჩაიკეტა, კარანტინი გამოცხადდა და ყველას არ შეეძლო [ხმის მიცემაში მონაწილეობა] — ამ მანიპულაციების მიუხედავად, პატრიოტულმა ოპოზიციამ ქვეყნის შიგნით მეტი ხმა დააგროვა, ვიდრე მაია სანდუს პარტიამ", — აღნიშნა რუსეთის საგარეო საქმეთა მინისტრმა.