2026 წელს "ოსკარის" 98-ე დაჯილდოებაზე საქართველო საკონკურსო ფილმის სტატუსით გიორგი სიხარულიძის ფილმს — "პანოპტიკონს" წარადგენს. ინფორმაციას საქართველოს ეროვნული კინოცენტრი ავრცელებს.

მათი ცნობთ, "16 სექტემბერს ეროვნული კინოცენტრის ორგანიზებით, სპეციალური კომისიის წევრების მიერ ფარული კენჭისყრის საფუძველზე გამარჯვებული ფილმი გამოვლინდა.

კინოცენტრის ორგანიზებით გამართულ კონკურსში საპროდიუსერო კომპანიებისგან წარდგენილი იყო ორი ფილმი: "ტერცო მონდო" (რეჟისორი: მერაბ კოკოჩაშვილი) და "პანოპტიკონი" (რეჟისორი: გიორგი სიხარულიძე).

"სპეციალური კომისია, რომელმაც საქართველოდან "ოსკარზე" წარსადგენი ფილმი შეარჩია, დარგის ექვსი პროფესიონალისგან შედგებოდა," — ნათქვამია კინოცენტრის მიერ გავრცელებულ ინფორმაციაში.

"პანოპტიკონში" მთავარ როლებს დათა ჩაჩუა, ქეთევან შერვაშიძე, მალხაზ აბულაძე და ია სუხიტაშვილი თამაშობენ.

შეგახსენებთ, რომ კინემატოგრაფისტების დიდი ნაწილი ბოიკოტის რეჟიმში რჩება და მონაწილეობას არ იღებს ეროვნული კინოცენტრის მიერ გამოცხადებულ კონკურსებში.

ბოიკოტში მყოფმა კინოს პროფესიონალებმა შექმნეს მოძრაობა "ქართული კინო საფრთხეშია" და აქტიურად არიან ჩართული ქვეყანაში მიმდინარე საზოგადოებრივ-პოლიტიკურ პროცესებში. ისინი "კულტურის სამინისტროს რეპრესიულ პოლიტიკას" აპროტესტებენ და "პროტესტის ნიშნად, უარს აცხადებენ მიტაცებული კინოცენტრის გამოცხადებულ კონკურსებსა და პროექტებში მონაწილეობაზე, საკონკურსო კომისიების წევრობაზე, რადგან არ სურთ იქნენ ფორმალურ თანამონაწილედ იმ პროცესისა, რომელსაც ქართული თანამედროვე კინო, კულტურა და მეცნიერება განადგურებისაკენ მიჰყავს", — ნათქვამია მოძრაობა "ქართული კინო საფრთხეშიას" მიერ 2023 წელს გავრცელებულ განცხადებაში.