ლედი გაგას გულშემატკივრებმა "ძველი გაგას" დაბრუნება ჯერ კიდევ შარშან შემოდგომაზე იწინასწარმეტყველეს, როცა მუსიკოსმა ახალი სინგლი გამოუშვა; მერე კი, ამ გაზაფხულზე, ეს ყველაფერი ახალი ალბომით Mayhem დაგვირგვინდა. თუმცა, გაგა ჩვენს გაოცებას არ წყვეტს და თავის პირვანდელ იმიჯს კიდევ ერთხელ ირგებს — მუსიკოსმა სულ ახლახან მორიგი სინგლი The Dead Dance გამოუშვა და ეს ამბავი Wednesday-ში თავის გამოჩენას დაამთხვია. სიმღერა სწორედ ნეტფლიქსის ამ გახმაურებული სერიალის საუნდტრეკია. ამასთან, ეს სინგლი, კიდევ ორ ახალ სიმღერასთან ერთად — Can't Stop the High და Kill for Love — ალბომ Mayhem-ის ვრცელ ვერსიას დაემატა.

სიმღერის თემატიკიდან და კონტექსტიდან გამომდინარე, გასაკვირი არაა, რომ ვიდეოკლიპი გოტიკურ სურათებს აცოცხლებს: მასში ვხედავთ, როგორ აღვიძებს და აცეკვებს თოჯინებს მუსიკოსი. არც ის არ იქნება გასაკვირი, თუ გეტყვით, რომ ვიდეოკლიპის რეჟისორი ჰორორის ჟანრის ცოცხალი ლეგენდა ტიმ ბარტონია, რომელიც ასევე გახლავთ Wednesday-ის აღმასრულებელი პროდიუსერი. კლიპი კი გადაღებულია საშიში მითებით ცნობილ "თოჯინების კუნძულზე", რომელიც მექსიკაში მდებარეობს.

ლედი გაგას Wednesday-ში აღმოჩენა კი ინტერნეტის დამსახურებაა: ჯერ კიდევ 2022 წელს, როცა სერიალის პირველი სეზონი გამოვიდა, ტიკტოკზე გავრცელდა მთავარი პერსონაჟის ცეკვის ვიდეო, რომელსაც ფონად გაგას ძველი სიმღერა Bloody Mary ედო. ვიდეომ მორიგ, უსაზღვროდ პოპულარულ ტრენდს დაუდო სათავე და მილიონობით ინტერნეტმომხმარებელმა ცეკვა სწორედ გაგას სიმღერის ფონზე გააცოცხლა. ვირუსული "ჩელენჯი" იმდენად მოედო ტიკტოკს, რომ თავად პოპვარსკვლავიც ჩაერთო მასში.

გაგას თქმით, მეორე სეზონის დაწყებამდე მას დაუკავშირდნენ პროექტის პროდიუსერები, რომლებიც ახალ მუსიკას ეძებდნენ. ამდენად, The Dead Dance საგანგებოდ Wednesday-ისთვის დაიწერა და მუსიკოსს სერიალში როლიც არგუნა.

"Wednesday-ის მეორე სეზონზე მუშაობისას, ჩემი მცირე როლის შესრულების პროცესში, დრო არაჩვეულებრივად გავატარე. ტიმ ბარტონთან, ჯენასთან [ჯენა ორტეგა, სერიალის მთავარი როლის შემსრულებელი] და სხვა ყველასთან მუშაობა ძალიან მომეწონა", — ამბობს გაგა.

მუსიკოსს ახლა საკმაოდ დატვირთული პერიოდი აქვს — ივლისის თვეში მან ახალი, თავის კარიერაში რიგით მერვე საკონცერტო ტურნე The Mayhem Ball წამოიწყო. რამდენიმე დღეში გაგას ასევე ვიხილავთ MTV-ის მუსიკალური ვიდეოების დაჯილდოებაზეც.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...