შენების მოძრაობის პირველი ნომერი და საკრებულოს თავმჯდომარეობის კანდიდატი გორში ადგილობრივი ტელეკომპანია თრიალეთის ერთ-ერთი მფლობელი, ბადრი ნანეტაშვილია. ის მოძრაობის ლიდერმა, დავით უსუფაშვილმა 21 სექტემბერს წარადგინა.

"ბადრის ჩვენთან ყოფნა არ ნიშნავს არაფერს ჟურნალისტებისთვის და მათი დამოუკიდებლობისთვის. მე მინდა, რომ ეს სხვაგანაც, სხვა ტელევიზიებში, სხვა ჟურნალისტებისთვის ასეთივე კომფორტული გარემო იყოს ქვეყანაში", - აღნიშნა უსუფაშვილმა ნანეტაშვილის წარდგენისას.

ბადრი ნანეტაშვილი 2004 წელს გახდა მეექვსე მოწვევის პარლამენტარი. ის საკანონმდებლო ორგანოში ნაციონალური მოძრაობა - დემოკრატების პარტიული სიით მოხვდა. ის 2003-2004 წლებში იყო შიდა ქართლში საქართველოს პრეზიდენტის სახელმწიფო რწმუნებულის მოადგილე.

2011 წლის დეკემბერში ნანეტაშვილი საქართველოს რეგიონულ მაუწყებელთა ასოციაციის აღმასრულებელმა დირექტორმა, ნათია კუპრაშვილმა ფიზიკურ შეურაცხყოფასა და იარაღით მუქარაში დაადანაშაულა.

იგივე შემთხვევა ნანეტაშვილმა Media.Ge-სთან საუბრისას ასე გაიხსენა:

"ჯერ გავაფრთხილე, რომ ნუ მეუზრდელებიო და ბოლოს ვუთხარი, უზრდელი ქალი ხარო… მერე გამოგვაცილა აირექსმა და მეუბნება [კუპრაშვილი] შენი თავი უნდა ვაცემინოვო და დაბლა რომ წამოვედით თავისი ქმარი და ვიღაც ტიპი დამახვედრა… ჯერ ვუთხარი, რომ დაახვიეთ და თავი გამანებეთო… ეს ტიპი მაინც იქაჩებოდა, მექაჩებოდა, გვერდზე მიმათრევდა… წამოდი და მანქანაში დავილაპარაკოთო, მაინც გამექაჩა, და იარაღი ამოვიღე და დედას გიტირებთ თუ არ მომეშვებითო… მაშინვე მოჯდნენ. დავჯექი მანქანაზე და წამოვედი."