ე.წ. ციანიდის საქმეზე გასამართლებული დეკანოზი გიორგი მამალაძე განმარტავს, თუ რა არის ასახული პირადი ცხოვრების შემცველ ფოტოებზე, რომელიც საქმის მასალებში იდო. დღეს, 21 სექტემბერს ტვ პირველმა აუდიო მასალა გაავრცელა და აღნიშნა, რომ მასზე დეკანოზ მამალაძის დასკვნითი სიტყვაა ჩაწერილი. ფოტოები გახდა ერთ-ერთი მიზეზი, რატომაც ციანიდის საქმის მოსამართლემ სასამართლო სხდომა დახურა.

"მე სპეციალურად არ ჩავუღრმავდი იმ უსირცხვილო, უსამართლო და კანონის უზენაესობის დარღვევის განხილვას, რომელსაც დღიდან ჩემი დაკავებისა და განსაკუთრებით ზოგიერთი მოწმის დაკითხვის წინ კადრულობდნენ პროკურატურის მესვეურები", - აცხადებს მამალაძე და ამატებს, რომ ამ გზით, პროკურატურა არასწორი ინფორმაციის გავრცელებას და უწყებისთვის სასურველი პასუხების მიღებას ცდილობდა.

აღნიშნული ფოტოების დეკანოზ მამალაძისეული ინტერპრეტაცია ასეთია:

  • ამ ფოტოებში გოგონა, ე.წ. პენუარით სათამაშოებთან ერთად. ეს ფოტოები ამ გოგონას გამოქვეყნებული აქვს თავის სოციალურ ქსელში. მე კი როგორც მისმა მეგობარმა გავაფრთხილე და გადავუგზავნე იმ მოტივით, რომ როგორც მღვდელმა არ იყო სასურველი მსგავსი ფოტოების სოციალურ ქსელში არსებობა.
  • მეორე ფოტოზე გამოსახულია სტიქაროსანი, რომელიც მოდელობის საქმიანობით არის დაკავებული და რომელსაც თავისივე სოციალურ ქსელში აქვს ფოტოები გამოქვეყნებული. ხოლო ერთ-ერთმა მოძღვარმა მამა ანდრია თურმანიძემ გადმომიგზავნა ისინი ინფორმაციისთვის, შენი ტაძრის სტიქაროსანს მსგავსი ფოტოები აქვს გამოქვეყნებული და იქნებ გაესაუბროო.
  • მესამე ფოტო გახლავთ პირადად ჩემი, სადაც გოგონას ვკოცნი. რაღაც აღშფოთება გამოიწვია ამან, თითქოს არავის არ ქონდეს გოგოზე ნაკოცნი, რომელიც 2006 წელს ზაფხულში ჩემ სასულიერო პირობამდეა გადაღებული.
  • მეოთხე ფოტოკოლაჟი გახლავთ ქერათმიანი სექსუალური გარეგნობის გოგონასთან სელფები და მისი ცალკეული ფოტოები. ეს გოგონა გახლავთ ჩემი დისშვილი მამის პირველი ქორწინებიდან.

ტაბულას ინფორმაციით, სტიქაროსანი კობა ფარტენაძე, რომელსაც მამალაძე თავის დასკვნით სიტყვაში ახსენებს, ამბობს, რომ დეკანოზმა სიმართლე თქვა.

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადებაში დასდეს ბრალი. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

5 სექტემბერს დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.