ტეხასის შტატის პატარა ქალაქ ენსონში მდებარე ბლუბონეტის იმიგრანტთა ცენტრის პატიმრებმა გარესამყაროს გზავნილი გამოუგზავნეს: SOS

საიმიგრაციო ცენტრთან სააგენტო როიტერის დრონის გადაფრენისას, 31-მა მამაკაცმა დაწესებულების ეზოში თავიანთი სხეულებით დაწერეს განგაშის სიგნალი - SOS

ათი დღის წინ, ცენტრში მყოფ ათეულობით ვენესუელელ დაკავებულს იმიგრაციის სამსახურიდან წერილობით აცნობეს, რომ ისინი ვენესუელური კრიმინალური ბანდის — Tren de Aragua-ს წევრებად ითვლებიან და ე.წ. საომარი კანონის საფუძველზე დეპორტაციას დაექვემდებარებიან.

დაკავებულები აცხადებენ, რომ მათ უსამართლოდ ადანაშაულებენ ვენესუელურ კრიმინალურ დაჯგუფებასთან კავშირში და ემუქრებათ დეპორტაცია ელ სალვადორის მაღალი რისკის მსჯავრდებულების ციხეში, CECOT-ში, სადაც, გავრცელებული ინფორმაციით, მძიმე პირობებია და არ არის უზრუნველყოფილი ადეკვატური სამართლებრივი პროცესი.

დაკავებულთა ოჯახები და ადვოკატები აღნიშნავენ, რომ დანაშაულებრივ ჯგუფებთან კავშირის ბრალდებები ხშირად ეფუძნება არასაკმარის მტკიცებულებებს, როგორიცაა ტატუები ან ფოტოზე აღბეჭდილი ჟესტები, რაც შესაძლოა მცდარ ინტერპრეტაციას დაექვემდებაროს. მიუხედავად იმისა, რომ აშშ-ის უზენაესმა სასამართლომ დროებით შეაჩერა დეპორტაციები, დაკავებულები კვლავაც გაურკვეველ მდგომარეობაში რჩებიან.

ბლუბონეტის დასაკავებელი ცენტრი დღეში დაახლოებით 800-მდე იმიგრანტს მასპინძლობს. დაკავებულები და მათი ოჯახები მოუწოდებენ საერთაშორისო საზოგადოებას, მიაქციოს ყურადღება მათ მდგომარეობას და უზრუნველყოს მათი უფლებების დაცვა.