თიბისი ბანკმა კავკასუს ონლაინს tbc-ის შემცველი დომენების გაყიდვის გამო კომუნიკაციების კომისიაში უჩივლა. ბანკი სადავოდ ხდის ფიზიკურ პირზე შემდეგ ინტერნეტ დომენების გაცემის ფაქტს: mytbc.ge, mytbcbank.ge, itbc.ge, itbcbank.ge.

როგორც ბანკის მიერ კომუნიკაციების კომისიისთვის მიწოდებული ინფორმაციით ირკვევა, მათ დაუკავშირდა მოქალაქე და tbc-ის შემცველი დომენის მიყიდვა შესთავაზა.

"თიბისი ბანკი საქპატენტში დარეგისტრირებულ განსაკუთრებულ უფლებას ფლობს შემდეგ სასაქონლე ნიშნების სიტყვიერ ნაწილებზე: TBC BANK და TBC, შესაბამისად, ბანკს აქვს სრული უფლება აუკრძალოს ნებისმიერ მესამე პირს ამ სიტყვათა იდენტური ან/და მსგავსი სიტყვების გამოყენება", - აღნიშნავს ბანკი კომისიისთვის მიწერილ წერილში და დასძენენ, რომ კომერციული ბანკების შესახებ კანონით არსებული გამონაკლისების გარდა, "ბანკის" შემცველი სიტყვის გამოყენების უფლება შესაბამის საქმიანობაზე ლიცენზიის გარეშე არავის აქვს.

თიბისი ბანკი ითხოვს კომისიამ დაავალოს კავკასუს ონლაინს მოქალაქის საკუთრებაში არსებული tbc-ის შემცველი დომენების გაუქმება და მფლობელის კანონდამრღვევად ცნოს.

საკითხის ზეპირი მოსმენის სხდომა კომუნიკაციების ეროვნულ კომისიაში 2017 წლის 28 სექტემბერს გაიმართება.