მთავრობის მიერ ინიცირებული კანონპროექტი, რომლის თანახმადაც შესაძლოა საარჩევნო კოდექსში ცვლილებები შევიდეს, რომელიც საშუალებას იძლევა კენჭისყრის შენობაში პოლიციელები საუბნო საარჩევნო კომისიის თავმჯდომარის მოთხოვნისა და თანხმობის გარეშეც იმყოფებოდნენ, თუ ეს სრულიად აუცილებელია საზოგადოებრივი წესრიგის დარღვევის აღკვეთის ან დაცვის მიზნით, უკვე დაარეგისტრირეს პარლამენტში.

ერთიანი ნაციონალური მოძრაობის პოლიტსაბჭოს თავმჯდომარე, დავით ბაქრაძე კანონპროექტის ინიცირებას კორცხელის ინცინდენტის გადაფარვისა და საერთაშორისო კრიტიკისათვის პასუხის გაცემის მცდელობად აფასებს და ამბობს, მთავრობას საზოგადოების ყურადღების არარსებულ თემაზე გადატანა სურს.

უმრავლესობის წარმომადგენლები კი განმარტავენ, რომ აღნიშნული კანონპროექტი საარჩევნო გარემოს გაუმჯობესებისთვის შეიმუშავეს. პარლამენტის ადამიანის უფლებათა დაცვის კომიტეტის თავმჯდომარე, ეკა ბესელია განმარტავს, რომ ინიციატივის მიზანია, საჭიროების შემთხვევაში, სამართალდამცავები ადგილზე იმყოფებოდნენ:

"კანონის გამკაცრება არის ერთ-ერთი და არა ერთადერთი პრევენცია, რომელიც ინიციატივა იყო პრემიერმინისტრის და ბუნებრივია ამ ინიციატივას აქვს კეთილშობილური მიზანი, რომ დავაზღვიოთ ძალადობრივი გარემოსაგან საარჩევნო პროცესები“.

აღნიშნულ კანონპროექტზე პარლამენტი საკომიტეტო მოსმენებს კვირის ბოლოს დაიწყებს, მომავალ კვირას კი სავარაუდოდ საკითხი პლენარულ სესიაზე გავა.