ქეით უინსლეტი სარეჟისორო კარიერას იწყებს. ლეგენდარული ინგლისელი მსახიობი თავისი სადებიუტო ფილმის გადასაღებად ემზადება. ოჯახურ დრამას, რომელსაც მაყურებელი ნეტფლიქსზე იხილავს, ივნისის გამოსათხოვარი (Goodbye June) ერქმევა, უინსლეტი კი, რეჟისორის სკამთან ერთად, პროდიუსერისა და მსახიობის როლებსაც მოირგებს.

ფილმს ვარსკვლავური სამსახიობო გუნდი ჰყავს: ქეითთან ერთად, მთავარ როლებს ჰელენ მირენი, ტონი კოლეტი, ტიმოთი სპოლი და ანდრეა რაიზბოროუ განასახიერებენ.

როგორც აღწერიდან ვიგებთ, Goodbye June-ში მოქმედება თანამედროვე ინგლისში ვითარდება, ამბავი კი ერთმანეთს დაშორებულ და-ძმებზეა, რომლებსაც მოულოდნელი გარემოებები ისევ გააერთიანებს. ნეტფლიქსის ცნობით, ფილმის გადაღებები მალევე დაიწყება.

ფოტო: HBO

იმის მიუხედავად, რომ უინსლეტს აქამდე სარეჟისორო გამოცდილება არ ჰქონია, ოსკაროსანი მსახიობის ამ დროისთვის ბოლო ნამუშევარი, ბიოგრაფიული დრამა Lee, მისივე პროდიუსერობით შეიქმნა. ამ ფილმისთვის, რომელიც ომის რეპორტიორ ელიზაბეთ "ლი" მილერის ცხოვრებაზე გვიყვება, უინსლეტი წლევანდელ ოქროს გლობუსზეც იყო ნომინირებული. თუმცა, პროდიუსერობის არცთუ სასიამოვნო გამოცდილება უინსლეტმა გასულ ზაფხულს ინტერვიუში გაიხსენა.

ერთ-ერთ პოდკასტში ქეითმა ასევე ისაუბრა, რომ რეჟისორობა არ სურდა — დიდწილად დროის ფაქტორის გამო — თუმცა, ბოლო პერიოდში კინოინდუსტრიაში მყოფი ქალების მიმართ გარკვეულ პასუხისმგებლობას გრძნობს.

"გადაღებებზე ბევრი ნაცნობი და კოლეგა მეკითხება ხოლმე, თავად რატომ არ იღებ ფილმებსო, მე კი მაშინვე ვაწყვეტინებ, ამას ნუ იტყვით-მეთქი", — აღნიშნა უინსლეტმა, — "მაგრამ რაც უფრო დაჟინებით ვამბობ უარს, მით მეტად მიჩნდება განცდა, რომ სხვა ქალებს მოტივაციას არ ვაძლევ".

ქეითმა ისიც თქვა, რომ ახლა ფილმის გადასაღებად საჭირო ცოდნა აქვს, რადგან რეჟისორობის ტექნიკური ასპექტები უკეთ ესმის.

"არავითარ შემთხვევაში არ გავაკეთებ იმას, რაც არ ვიცი, როგორ შევასრულო სათანადოდ", — ამატებს კინოვარსკვლავი.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...