ჰოგვორტსში დაბრუნებამდე სულ უფრო და უფრო ცოტა დრო რჩება. ყველაფერი თუ გეგმის მიხედვით წავიდა, ჰარი პოტერის სერიალის პრემიერას მომავალი წლისთვის უნდა ველოდოთ. HBO-ის მასშტაბური პროექტისთვის მოსამზადებელი სამუშაოები უკვე დაწყებულია: დაწერილია საპილოტე ეპიზოდის სცენარი, მიმდინარეობს მსახიობების შერჩევაც.

ერთ-ერთი ყველაზე მნიშვნელოვანი პერსონაჟი, რომლის როლზეც ბოლო თვეების განმავლობაში არაერთი მსახიობი განიხილებოდა, ალბუს დამბლდორია. ჰოგვორტსის მაგიისა და ჯადოქრობის სკოლის დირექტორის განსახიერების სურვილი გამოთქვა გარი ოლდმანმა (რომელმაც ჰარი პოტერის ფილმებში სირიუს ბლექიც ითამაშა), ამ როლზე განიხილებოდა ოსკაროსანი ინგლისელი მსახიობი მარკ რაილანსიც.

თუმცა, ვებგამოცემა Deadline-ის ექსკლუზიური ცნობით, დამბლდორის როლისთვის მსახიობი თითქმის შერჩეულია უკვე და ეს არც ოლდმანია და არც რაილანსი; ესაა ორი ოქროს გლობუსის მფლობელი ამერიკელი მსახიობი ჯონ ლითგოუ. Deadline-ის წყაროების მიხედვით, ლითგოუსა და HBO-ის შორის მოლაპარაკებები უკვე დასასრულს უახლოვდება. თუმცა, კინოსტუდიას ოფიციალურად ჯერ არაფერი დაუდასტურებია.

ჯონ ლითგოუ უინსტონ ჩერჩილის როლში (The Crown)

ფოტო: Netflix

მითქმა-მოთქმის მიუხედავად, ჰარი პოტერის სერიალში ჯერჯერობით არცერთი მსახიობის მონაწილეობა არაა დადასტურებული. ამიტომ, სოციალურ ქსელებში ფანებიც თამამად განიხილავენ ამა თუ იმ მსახიობის პერსპექტივას სხვადასხვა როლზე. მაგალითად, სურთ, ლორდი ვოლდემორი კილიან მერფიმ განასახიეროს.

რაც შეეხება დამბლდორს, ჯოან როულინგის წიგნების ეკრანიზაციებში ჯადოქრების სკოლის დირექტორი სამმა სხვადასხვა მსახიობმა განასახიერა: ჰარი პოტერის ფილმებში მისი როლი რიჩარდ ჰარისმა და მაიკლ გემბონმა შეასრულეს, ჯადოსნური ცხოველების სერიაში კი ახალგაზრდა დამბლდორი ჯუდ ლოუმ ითამაშა.

ფოტო: Warner Bros.

წლების განმავლობაში გავრცელებული ხმები, ჰარი პოტერის სერიალზე მუშაობის შესახებ, საბოლოოდ 2023 წელს დადასტურდა. მაშინ გავიგეთ ისიც, რომ სერიალი მთელ ათწლეულს გასტანს, თითოეულ წიგნს კი თითო სეზონი დაეთმობა.

ჰარი პოტერი ყველა დროის ერთ-ერთი ყველაზე პოპულარული წიგნების სერიაა. ის თარგმნილია 87 ენაზე და მსოფლიოში 600 მილიონზე მეტ ეგზემპლარად არის გაყიდული. შვიდწიგნეულის მიხედვით გადაღებული რვავე ფილმის შემოსავალმა კი ჯამში $7,7 მილიარდს გადააჭარბა.

ნახეთ ჩვენი ყველა მასალა ჰარი პოტერზე.