ჟურნალისტი და სამოქალაქო აქტივისტი მირიან ბერულავა დააკავეს. დაკავებამდე მირიან ბერულავამ სოციალურ ქსელში დაწერა, რომ მასთანაც მივიდნენ და გამოკითხვაზე სურდათ გადაყვანა.

"ვისაც ჰყავს დიდი ტრაქტორები და ტრაილერები უნდა დაგვეხმარონ ავტობანის გადაკეტვაში. მისი ახლობლები მირიან ბერულავას დაკავებას სწორედ ამ პოსტს უკავშირებენ", — დაწერა დაკავებამდე რამდენიმე საათით ადრე მირიან ბერულავამ.

შინაგან საქმეთა სამინისტროს ცნობით, ჟურნალისტი მირიან ბერულავა ადმინისტრაციული წესით დააკავეს. მას გამოძიება, 173-ე მუხლით ედავება, რაც სამსახურებრივი მოვალეობის შესრულების დროს, სამართალდამცავი ორგანოს თანამშრომლის და სხვა შესაბამისი სახელმწიფო ორგანოს წარმომადგენლის კანონიერი განკარგულებისადმი ან მოთხოვნისადმი დაუმორჩილებლობას გულისხმობს.

ადვოკატ ვალერი თევდორაძის ინფორმაციით, მირიან ბერულავა სამტრედიაში დროებითი მოთავსების იზოლატორში ჰყავთ გადაყვანილი.

დღეს, შსს-ს თანამშრომლებმა "დაიტოვეს" ადმინი ილია ღლონტი, სახლის ჩხრეკის შემდეგ, განყოფილებაში გადაიყვანეს. მეორედ დააკავეს აქტივისტი ისაკო დევიძე. "მთავარი არხის" ინფორმაციით, საპოლიციო ძალებმა კიდევ ერთი მოქალაქის, სანდრო ჭითანავას სახლი გაჩხრიკეს და ის პოლიციაში წაიყვანეს.

რაც შეეხება "დაიტოვეს" კიდევ ერთ ადმინის, ნენსი ვოლანდს, მის სახლში ჩხრეკა ჩატარდა.
ამის პარალელურად, შსს-მ განცხადება გაავრცელა, სადაც წერია, რომ ჯგუფური ძალადობის ორგანიზებისა და ჯგუფური მოქმედების ორგანიზების ფაქტზე სამართალდამცველები თბილისის მასშტაბით, სხვადასხვა ლოკაციაზე, საგამოძიებო მოქმედებებს ატარებენ და ხორციელდება საქმესთან შემხებლობაში მყოფი პირების პირადი და სახლების ჩხრეკა.