HBO-ს რეკორდულად რეიტინგული სერიალი ნამდვილი დეტექტივი მესამე სეზონისთვის ემზადება.

როგორც გაირკვა, შოუს გუნდს კიდევ ორი სცენარისტი დევიდ მილჩი და ჯერემი სალნირი შეუერთდათ, რომლებიც სერიალის შემქმნელ ნიკ პიზოლატოსთან ერთად ახალ სცენარზე მუშაობენ.

რამდენიმე თვის წინ გავრცელდა ცნობა იმის შესახებ, რომ შესაძლოა ახალ სეზონში მეთიუ მაკკონაჰიც ვიხილოთ.

მაკკონაჰის თქმით, თუ HBO და ნამდვილი დეტექტივის შემქმნელი ნიკ პიზოლატო შეთანხმდებიან, ის მზად არის სერიალის ახალ სეზონში მიიღოს მონაწილეობა.

აღსანიშნავია, რომ მეორე სეზონის დასრულების შემდეგ უკვე ორი წელი გავიდა, HBO-ს კი, როგორც ჩანს ნამდვილი დეტექტივის ეკრანზე დაბრუნება ეჩქარება.

"ეს შოუ [ნამდვილი დეტექტივი] ჩვენი არხის [HBO] სავიზიტო ბარათია. მაყურებელი ორი წელი ელოდება როდის დაბრუნდება ის ჩვენს არხზე, რეკავენ, გვწერენ, არ გამიკვირდება თუ საპროტესტო აქციებსაც მოგვიწყობენ. ხალხს სურს ნამდვილი დეტექტივი და მიიღებს", - ამბობს მაიკლ ლომბარდო, HBO-ს პრეზიდენტი.

ცნობა მაკკონაჰის მესამე სეზონში დაბრუნების შესახებ მაშინვე გაქრა, როგორც კი გახმაურდა, რომ HBO-მ ახალ სეზონში მთავარ როლზე ოსკარის მფლობელი მსახიობი მაჰერშალა ალი დაამტკიცა, რომელიც სერიალში დეტექტივ უეინ ჰეისის როლს მოირგებს.

ალის შემდეგ, HBO-მ მეორე მთავარი როლის შემსრულებელი სტივენ დორფიც წარადგინა.

დორფი სერიალში როლანდ უესტის როლს ითამაშებს, რომელიც არკანზასის შტატის პოლიციის კრიმინალურ განყოფილებაში 30 წელზე მეტია მუშაობს.

ამავდროულად ცნობილი გახდა ისიც, რომ სამსახიობო ანსამბლს კარმენ ეჯოგოც შეუერთდა, რომელიც არკანზასის სკოლის მასწავლებლის, ამელია რეარდონის როლს მოირგებს.

რამდენიმე დღის წინ კი HBO-მ მესამე სეზონში კიდევ ერთი მსახიობი, მერილ სტრიპის შვილი, მემი გამერი დაამტკიცა.

მსახიობი სერიალში ახალგაზრდა დედის, ლუსი პარსლის როლს შეასრულებს, რომელიც დიდი ტრაგედიის ეპიცენტრში აღმოჩნდება.

რაც შეეხება თემას, როგორც ცნობილია ის ოზარკის მთებში მომხდარ კრიმინალურ და მისტიკურ ისტორიას შეეხება. სიუჟეტი კი დროის სამ სხვადასხვა, განსხვავებულ მონაკვეთში ვითარდება.

წერენ იმასაც, რომ შესაძლოა ერთ-ერთი წამყვანი თემა რასისტულ ნიადაგზე ჩადენილი დანაშაულები იყოს.

ვრცელდება ინფორმაცია იმის შესახებაც, რომ მესამე სეზონში თამაში სურთ ისეთ მსახიობებს, როგორებიც არიან რაიან გოსლინგი, ბენ აფლეკი, ჯოდი ფოსტერი, ქეისი აფლეკი, ჯარედ ლეტო, ემი ადამსი და მელისა მაკარტნიც კი.

ჯერ-ჯერობით ოფიციალურად არ არის დადასტურებული როდის დაბრუნდება სერიალი ეკრანზე, მაგრამ როგორც ამბობენ, შესაძლოა, ეს 2018 წლის ზამთარში მოხდეს.