ქართველი მწერალი აკა მორჩილაძე 2025 წლის ნობელის პრემიაზე ლიტერატურის დარგში წარადგინეს. ინფორმაციას ამის შესახებ შოთა რუსთაველის სახელობის ქართული ლიტერატურის ინსტიტუტი ავრცელებს. გადაწყვეტილება სწორედ ქართული ლიტერატურის ინსტიტუტის, თსუ-ის ჰუმანიტარულ მეცნიერებათა ფაკულტეტის პროფესურისა და შედარებითი ლიტერატურის ქართული ასოციაციის საბჭოს მიერ იქნა მიღებული.

მორჩილაძე ნობელის პრემიაზე 2024 წელსაც იყო წარდგენილი. შარშან ეს ჯილდო სამხრეთკორეელ ჰან განს ერგო.

ნობელის პრემია მსოფლიოში ერთ-ერთი ყველაზე გავლენიანი საერთაშორისო ჯილდოა, რომლის დაარსებაც შვედი ქიმიკოსის ალფრედ ნობელის სახელს უკავშირდება. პრემია 1901 წლიდან გაიცემა ქიმიის, ფიზიკის, ლიტერატურის, მშვიდობისა და ფიზიოლოგია/მედიცინის დარგში. პრემიის ლაურეატებს 9 მილიონი შვედური კრონა გადაეცემათ, რაც, დაახლოებით, ერთ მილიონ დოლარს უდრის.

ლიტერატურის დარგში ნობელის პრემია წინათ მიღებული აქვთ ისეთ ცნობილ ავტორებს, როგორებიც არიან ჰაინრიხ ბიოლი (1972), ჟოზე სარამაგუ (1998), მარიო ვარგას ლიოსა (2010) და სვეტლანა ალექსიევიჩი (2015).

რაც შეეხება აკა მორჩილაძეს, იგი თანამედროვე ქართული ლიტერატურის ერთ-ერთი ყველაზე აღიარებული წარმომადგენელია. ოცამდე რომანისა და რამდენიმე პროზაული კრებულის ავტორი არაერთი ლიტერატურული პრემიის მფლობელიცაა, მათ შორის, საბას ექვსგზის ლაურეატი. მორჩილაძის ნაწარმოებები თარგმნილია ინგლისურ, გერმანულ, უკრაინულ, რუსულ, თურქულ, ბულგარულ, აზერბაიჯანულ, იტალიურ და სხვა ენებზე. მათ მიხედვით გადაღებულია ფილმები და დადგმულია სპექტაკლები.

ასევე იხილეთ:

თუ წიგნების კითხვა და მათი განხილვა არასდროს გბეზრდება, შემოგვიერთდი ჯგუფში ერთი გვერდიც და...