გორის ხელოვნების სახლმა, რომელსაც საპროტესტო ინსტალაციის განთავსების შემდეგ ქალაქის მერია შენობას ატოვებინებს, თავისი მორიგი გზავნილი სახელოვნებო ბაზრობაზე წარმოადგინა. "დაცენზურებულია", — ამ წარწერითა და ჩამოფარებული ცელოფნის ფარდით განთავსდა ახალი ინსტალაცია თბილისის ფოტოგრაფიისა და მულტიმედიის მუზეუმში; ფარდის მიღმა ხელოვნების სახლის წინა ინსტალაცია იმალება: "ნაომარი ქალაქი ბოდიშს არ იხდის".

"ინსტალაცია ეხმიანება საქართველოში ხელოვნებისა და კულტურის ცენზურის მცდელობებს", — წერს ხელოვნების სახლი, — "ის გამოხატავს პროტესტს, როგორც, ზოგადად, თავისუფალი სიტყვის შეზღუდვის, ასევე გორის ხელოვნების სახლის წინააღმდეგ განხორციელებული ზეწოლის მიმართ".

ფოტო: ხელოვნების სახლი

ხელოვნების სახლმა, გორელი მოხალისეების მიერ შექმნილმა თავისუფალმა სივრცემ, გასული წლის 16 ნოემბერს წარმოადგინა ინსტალაცია, რომელიც სხვადასხვა დროის ქართულ საპროტესტო გზავნილებს აერთიანებდა, მათ შორის, ფრაზას "ნაომარი ქალაქი ბოდიშს არ იხდის". ინსტალაციის განთავსებიდან რამდენიმე დღეში ხელოვნების სახლმა წერილი მიიღო ქალაქის მერიიდან, რომელიც მათ ხელშეკრულების შეწყვეტასა და შენობის დატოვებას სთხოვდა. ამ გადაწყვეტილებას ინსტალაციის ავტორები პირდაპირ უკავშირებენ თავიანთ ნამუშევარს და აღნიშნავენ, რომ ეს გამოხატვის თავისუფლების შეზღუდვის მცდელობაა.

"ეს ქმედებები აღიქმება არა მხოლოდ კონკრეტული გამოფენის, არამედ, ზოგადად, თავისუფალი კულტურული სივრცეების მიმართ შემზღუდავ ნაბიჯად, რაც დიდ კრიზისს უქმნის რეგიონში თავისუფალი ხელოვნების განვითარებას", — აღნიშნულია ხელოვნების სახლის განცხადებაში.

სახელოვნებო ბაზრობა, სახელწოდებით FEARLESS ("უშიშარი"), მუზეუმში 11 იანვარს გაიხსნა და 14 იანვრის ჩათვლით გაგრძელდება. მსურველებს გამოფენაში მონაწილე გალერეების წარმოდგენილი ნამუშევრების ხილვა და შეძენა 13 საათიდან 19 საათამდე შეუძლიათ. ბაზრობიდან შემოსული თანხა მთლიანად მოხმარდება ღია გალერეა/ღია სახელოსნო — რეზიდენციის ორგანიზებას.

ასევე იხილეთ: