აფხაზეთში საკონსტიტუციო კანონპროექტის განხილვა დაიწყეს, რომელიც თვითგამოცხადებული რესპუბლიკის მინისტრთა კაბინეტის გაუქმებას ითვალისწინებს, რაც პრემიერ-მინისტრისა და ვიცე-პრემიერის პოსტების გაუქმებას გამოიწვევს. ინფორმაციას ეხო კავკაზა ავრცლებს.

აფხაზეთის პრემიერ-მინისტრის პოსტს ამჟამად ალექსანდრე ანქვაბი იკავებს.

გამოცემა წერს, რომ 11 ნოემბერს პარლამენტის სახელმწიფო-სამართლებრივი პოლიტიკის კომიტეტის სხდომაზე კონსტიტუციაში ცვლილებები განიხილეს. დოკუმენტი საკონსტიტუციო რეფორმის კომისიის მიერ წარმოდგენილი წინადადებების საფუძველზე მომზადდა.

ე.წ. პრეზიდენტის პრესსამსახურის განცხადებაში ნათქვამია, რომ კომიტეტის წევრებმა გადაწყვიტეს, რომ ეს საკითხი პარლამენტის მომდევნო სხდომაზე პირველი მოსმენით მიღებისთვის წარედგინათ. შეხვედრა, წინასწარი ინფორმაციით, 15 ნოემბერს არის დაგეგმილი. იმავე დღეს პარლამენტი საინვესტიციო პროექტების განხორციელების შესახებ რუსეთ-აფხაზური შეთანხმების რატიფიცირების საკითხის განხილვას გეგმავს, რასაც ოპოზიცია ეწინააღმდეგება.