კოალიცია ცვლილებისთვის და ერთიანობა -ნაციონალური მოძრაობის წევრები ცესკოს სიების გასაუქმებლად მიმართავენ. ოპოზიციის ლიდერები საპარლამენტო მანდატებზე უარს ამბობენ და მოუწოდებენ ცენტრალურ საარჩევნო კომისიას, არ გაატაროს რეგისტრაციაში, როგორც არჩეული პარლამენტის წევრები და არ მისცენ დროებითი მოწმობა საქართველოს პარლამენტის წევრად არჩევის შესახებ.

"ყველა, ვინც ამ სიაში ვართ, უარს ვაცხადებთ ნებისმიერი თანამშრომლობაზე რეჟიმთან, რომელიც იპარავს არჩევნებს და გამოხატავს რუსეთის ფედერაციის ინტერესებს ჩვენს სამშობლოში", — განაცხადა ნიკა გვარამიამ.

იგივე მოთხოვნა აქვს ერთიანობა - ნაციონალურ მოძრაობასაც.

"ჩვენ უარს ვამბობთ მანდატები მივიღოთ იმ საპარლამენტო არჩევნების შედეგად, სადაც ადგილი ჰქონდა ტოტალურ გაყალბებას", — აღნიშნა ერთიანობა - ნაციონალური მოძრაობის თავმჯდომარემ თინა ბოკუჩავამ.

როგორც ოპოზიციის ლიდერები აცხადებენ, ხელისუფლებამ არჩევნები მოიპარა და პარლამენტი არალეგიტიმურია. მათი განმარტებით, საარჩევნო სიაში მყოფი პოლიტიკოსები უარს აცხადებენ ნებისმიერი ფორმით თანამშრომლობაზე რეჟიმთან, რომელმაც არჩევნები მოიპარა.

იმ შემთხვევაში თუ ცესკო და საქართველოს პარლამენტი მათ მოთხოვნას არ დააკმაყოფილებენ, ოპოზიციონერი პოლიტიკოსები მზად არიან, საკუთარი გადაწყვეტილება საპარლამენტო მანდატზე უარის თქმასთან დაკავშირებით დოკუმენტურად დაადასტურონ.