ტელეგრამ-არხი რესპუბლიკა წერს, რომ ოკუპირებული აფხაზეთის ე.წ. პრეზიდენტი ასლან ბჟანია ვა-ბანკზე წავიდა და ოპოზიციონერების დაპატიმრება დაიწყო.

გავრცელებული ინფორმაციით, ომარ სმირი, გარი კოკაია, ალმასხან არძინბა, რამაზ ჯოპუა და ასლან გვარამია გუდაუთიდან, საზოგადოებრივი შეკრებიდან ბრუნდებოდნენ, როცა დააკავეს და ე.წ. სახელმწიფო უსაფრთხოების სამსახურში გადაიყვანეს. რესპუბლიკას ინფორმაციით, ოპოზიციონერების დაკავებიდან საათზე ნაკლებ დროში, ადგილზე ასობით ადამიანი მივიდა. შეკრებილებსა და ძალოვნებს შორის დრო და დრო მდგომარეობა იძაბება.

ტელეგრამში წერენ, რომ ოპოზიციონერების დაკავების მიზეზი უცნობია.

ტელეგრამ-არხი რესპუბლიკა წერს, რომ ოპოზიციურად განწყობილმა მოქალაქეებმა ამ დროისთვის გუდაუთის ხიდი გადაკეტეს. ისინი უკანონოდ დაკავებული ოპოზიციონერების გათავისუფლებას მოითხოვენ, რომლებიც რუსულ-აფხაზური "საინვესტიციო ხელშეკრულების" რატიფიცირებას ეწინააღმდეგებიან.

მანამდე, ცნობილი გახდა, რომ ოპოზიცია 15 ნოემბერს საპროტესტო აქციის ჩატარებას გეგმავს. ამავე დღეს ოკუპირებული აფხაზეთის დე ფაქტო პარლამენტი რუსულ-აფხაზური "საინვესტიციო ხელშეკრულების" რატიფიცირებას გეგმავს.

სოციალურ ქსელში ვრცელდება ოპოზიციონერების დაკავების კადრებიც. ოკუპირებული აფხაზეთის ოფიციალური სტრუქტურები ამ ინფორმაციასთან დაკავშირებით კომენტარს არ აკეთებენ.